Nýir og glæsilegir hjólastígar verða lagðir í borginni á þessu ári og munu kosta tæpan milljarð.
Borgarráð hefur heimilað umhverfis- og skipulagssviði að bjóða út framkvæmdir við gerð nýrra hjólastíga á nokkrum stöðum í borginni. Kostnaðaráætlun er 960 milljónir króna. Ríkið kemur myndarlega að verkefninu í gegnum samgöngusáttmálann og kostar framkvæmdir upp á 570 milljónir króna.
Um er að ræða verkefni sem rúmast innan hjólreiðaáætlunar borgarinnar og samgöngusáttmála. Verkefnin hafa þegar verið samþykkt í skipulags- og samgönguráði.
Sérstakir hjólastígar eru með tveimur akreinum fyrir reiðhjól og rafskutlur og eru aðgreindir frá umferð gangandi og akandi þar sem því verður við komið.
Verkefni ársins í ár sem heyra undir hjólreiðaáætlun eru eftirfarandi:
- Rafstöðvavegur
- Hæðargarður
- Háaleitisbraut (Bústaðavegur-Fossvogur),
- Hjólastæði, hjólateljarar og fræðsla ásamt eftirstöðvum verkefna frá fyrra ári. Þá verður unnið að undirbúningi og forhönnun vegna verkefna næsta árs.
Verkefni samgöngusáttmála eru:
- Eiðsgrandi (Boðagrandi - Hringbraut)
- Bústaðavegur (Veðurstofuvegur-Litluhlíð)
- Bústaðavegur 151-153 ásamt undirgöngum
- Bústaðavegur (brú yfir Kringlumýrarbraut).
Samkvæmt kostnaðaráætlun munu þessi verkefni kosta 960 milljónir króna. Þar af eru verkefni hjólreiðaáætlunar 390 milljónir króna og verkefni samgöngusáttmála 570 milljónir króna.
Hjólaborgin Reykjavík
Samgöngusáttmálinn