Þorvaldur Daníelsson er bráðum fimmtugur Breiðhyltingur. Hann er sjaldan kallaður annað en Valdi í Hjólakrafti. Hann er Reykvíkingur ársins 2020.
Valdi var framkvæmdastjóri hjá Krafti - stuðningsfélagi fyrir ungt fólk með krabbamein árið 2012 þegar honum datt í hug að stofna vísinn að Hjólakrafti, þá fyrir krakka sem voru í Heilsuskólanum á LSH. Í dag er snertir Hjólakraftur líf um 500 einstaklinga á höfuðborgarsvæðinu og víðar. Sjálfur var hann ekki með krabbamein en hann missti eiginkonu sína úr krabbameini. „Lífið heldur áfram,“ segir hann. „Það bara fór svona, því miður.“
Hjólin byrjuðu að rúlla þegar hann kom á þessu samstarfi við Heilsuskólann en þar voru ungir krakkar sem voru að glíma við lífsstílssjúkdóma. Í dag er Hjólakraftur hins vegar fyrir ungt fólk. Margir halda að þetta sé aðeins fyrir þá sem glíma við einhvern vanda, en allir eru velkomnir og allir eru hvattir til að byrja að hjóla úti.
„Hjólakraftur varð til þegar ég fékk hugmynd að því að fara af stað með forvarnarverkefni í samvinnu við Heilsuskóla Landspítalans en þar voru krakkar sem höfðu fæstir verið mikið að hreyfa sig. Þetta voru fyrstu krakkarnir sem ég náði út að hjóla. Ég sagði við þau fyrstu eftir að þau höfðu tekið þátt í námskeiði hjá mér að ef þau yrðu dugleg að æfa sig um veturinn myndum við taka þátt í Wow Cyclothon um sumarið. Ég hafði samband við Skúla Mogensen og hann var til í að gefa þessu tækifæri þótt þau væru of ung fyrir keppnina. Þetta tókst mjög vel og krakkarnir stóðu við sitt og hjóluðu hringinn. Við fengum umfjöllun í fjölmiðlum um þetta og vorum varla lögð af stað þegar síminn byrjaði að hringja. Ég var spurður að því hvort þetta gæti ekki hentað ungu fólki með ADHD og krökkum í alls konar vanda. Ég svaraði því til að Hjólakraftur væri bara fyrir alla. Hjólin hafa bara ekki hætt að snúast síðan.“
Valdi er með samninga við ýmsa grunnskóla á höfuðborgarsvæðinu en til hans koma einnig ungmenni úr framhaldsskólum eins og Fjölbraut í Breiðholti og Menntaskólanum í Kópavogi. Hann rekur nú höfuðstöðvar Hjólakrafts í húsnæði sem borgin leigði ódýrt út til ýmissa samtaka og einstaklinga í verslunarkjarna í Arnarbakka og er nýbúinn að standsetja annað húsnæði í Völvufelli í Efra-Breiðholti. Þar er m.a. klifurveggur og fleira skemmtilegt. „Starfsemin snýst einfaldlega um að ná ungu fólki úr vanvirkni í virkni,“ segir hann.
Valdi er með BA gráðu í stjórnmálafræði og árið 2015 lauk hann MBA námi frá Háskólanum í Reykjavík.. Hann hefur m.a. unnið sem framkvæmdastjóri fyrirtækja. „Þegar ég var tvítugur og eftir það snerist lífið bara um að vinna og vinna og koma sér fyrir í lífinu. En líkaminn var að grotna niður. Þannig að ég byrjaði að hjóla. Hjólreiðar eru frábært fjölskyldusport og góð hreyfing til að koma sér í form. Það geta allir hjólað sem hafa lært það einu sinni. Maður getur ef til vill ekki spilað fótbolta við börnin en það geta allir sem geta setið á reiðhjóli hjólað saman. Ég hef farið með krakka í Cyclothonið sex sinnum og það gerir ótrúlega mikið fyrir þau að taka þátt í þessu og klára það. Áherslan hjá okkur er að allir geti verið með. Það hafa allir gott af því að vera úti, reyna á sig og eignast nýja vini í gegnum hjólreiðarnar eða annað útivistarsport. Stærsti sigurinn felst svo í því að sigra sjálfan sig.“
Áhugasamir um Hjólakraft geta skoðað heimasíðu félagsins og fylgst með á Facebook.