Minningarstund um kvenréttindakonuna Bríeti Bjarnhéðinsdóttur
Það var hátíðleg minningastund í Hólavallakirkugarði í morgun þegar lagður var blómsveigur á leiði Bríetar Bjarnhéðinsdóttur kvenréttindakonu og fyrrverandi bæjarfulltrúa í Reykjavík.
Þetta er í tíunda sinn sem lagður er blómsveigur á leiði Bríetar á kvenréttindadaginn til þess að minnast þessarar merku konu sem barðist fyrir lágmarksréttindum kvenna, svo sem kosningarétti, kjörgengi og rétti til menntunar og atvinnu. Una Torfadóttir, tónlistarkona, flutti tvö lög. Þær Ronja Sif Matthíasdóttir og Aría Björk Daníelsdóttir gengu með blómsveiginn og afhentu Magneu Gná Jóhannsdóttur varaforseta borgarstjórnar, sem kom honum fyrir á leiði Bríetar. Að því loknu hélt hún stutt ávarp.
Bríet Bjarnhéðinsdóttur átti ríkan þátt í að koma á réttarbótum konum til handa og efla þannig lýðræðissamfélagið í heild sinni. Hún var stofnandi Kvenréttindafélags Íslands og var fyrsti formaður félagsins frá stofnun allt til ársins 1928. Markmið félagsins var að starfa að því að íslenskar konur fengju fullt stjórnmálajafnrétti á við karlmenn, kosningarétt, kjörgengi svo og embættisgengi og rétt til atvinnu með sömu skilyrðum og karlmenn.
Konur í Reykjavík buðu fram sérstakan Kvennalista fyrir bæjarstjórnarkosningar árið 1908 og var það fyrsta sérframboð kvenna á Íslandi. Kvennalistinn vann stórsigur, kom öllum sínum fulltrúum að. Konurnar fjórar, þær fyrstu sem settust í bæjarstjórn Reykjavíkur, voru Bríet Bjarnhéðinsdóttir, Guðrún Björnsdóttir, Katrín Magnússon og Þórunn Jónassen. Málin sem þær börðust fyrir í bæjarstjórn voru m.a. sundkennsla, fyrir bæði kynin, og leikvellir fyrir börn. Vegna mikillar fátæktar í bænum voru mörg börn vannærð. Bríet Bjarnhéðinsdóttir beitti sér fyrir því í bæjarstjórn að börn fengju mat í skólanum. Matargjafir komust á og var þeim haldið áfram af og til fram á fjórða áratuginn. Bríet lést í Reykjavík árið 1940.
