Hugmyndagátt í tengslum við hönnunarsamkeppni um nýjan miðborgarleikskóla og fjölskyldumiðstöð er opin til loka ágústmánaðar til að íbúar, notendur þjónustunnar og aðrir áhugasamir geti komið sjónarmiðum sínum á framfæri.
Leikskólinn Miðborg fær nýtt húsnæði á lóð við Njálsgötu 89 sem er betur þekkt sem Njálsgöturóló og hefur Reykjavíkurborg efnt til hönnunar- og framkvæmdasamkeppni í samvinnu við Arkitektafélag Íslands. Hugmyndir sem settar verða á hugmyndagáttina verða hafðar til hliðsjónar bæði fyrir þáttakendur samkeppninnar og dómnefndina.
Leitað er hugmynda í fjórum flokkum:
- Útisvæðið
- Byggingin – miðmót og yfirbragð
- Starf leikskólans
- Fjölskyldumiðstöðin
Skilafrestur tillagna í hugmyndasamkeppnina rennur út 7. október. Nánari upplýsingar um hönnunarsamkeppni leikskólans og fjölskyldumiðstöðvar er að finna á vefsíðunni reykjavik.is/midborgarleikskoli.