Jólaskógurinn í Tjarnarsal Ráðhúss Reykjavíkur var opnaður i morgun með pompi og prakt.
Þetta er í áttunda sinn sem Tjarnarsalnum er breytt í jólaskóg þar sem börnin geta leikið sér. Að þessu sinni er hönnun og framkvæmd verkefnisins í höndum Steins Einars Jónssonar, upplifunarhönnuðar.
Boðið er upp á bókahorn þar sem hægt er að velja úr bókum sem þar er að finna. Einnig eru alls kyns spil í boði.
Leikskólabörnum frá Hagaborg var boðið á opnunina í morgun. Dagur B. Eggertsson borgarstjóri ávarpaði börnin auk þess sem skötuhjúin Grýla og Leppalúði mættu á svæðið og sögðu börnunum sögur af jólasveinunum sem koma brátt til byggða. Þá sungu börnin jólalög með Grýlu og Leppalúða og gæddu sér á heitu súkkulaði með rjóma og smákökum.
Jólaskógurinn er opinn virka daga frá 8.00 til 18.00, á laugardögum frá klukkan 10.00 til 18.00 og sunnudögum frá klukkan 12.00 til 18.00
Komið og njótið jólaskógarins.