Borgarráð samþykkti á fundi sínum í gær að fela innri endurskoðun Reykjavíkurborgar að ráðast í heildarúttekt á ferlinu varðandi endurgerð þriggja húsa við Nauthólsveg 100.
Tillaga meirihluta Samfylkingar, Viðreisnar, Pírata og Vinstri grænna var svohljóðandi.
„Borgarráð samþykkir að fela innri endurskoðun Reykjavíkurborgar að ráðast í heildarúttekt á öllu því ferli sem endurgerð braggans fól í sér. Enginn angi málsins skal vera undanskilinn og allt skal upplýst í þessu máli frá upphafi til enda. Einnig er óskað eftir því að innri endurskoðun Reykjavíkur geri tillögur að umbótum í tengslum við það sem aflaga hefur farið og í bága við vandaða stjórnsýsluhætti.“
Nokkuð var um bókanir fulltrúa minnihlutans á fundinum vegna málsins sem lesa má um í fundargerð.