Iðunn og Sigurlaug ráðnar skólastjórar
Iðunn Pála Guðjónsdóttir hefur verið ráðin skólastjóri Hvassaleitisskóla og Sigurlaug Hrund Svavarsdóttir hefur verið ráðin skólastjóri Langholtsskóla.
Nýr skólastjóri Hvassaleitisskóla
Iðunn Pála lauk B.Ed. gráðu í grunnskólakennarafræðum frá Háskóla Íslands árið 2006 og hefur starfað við fjölbreytt störf í grunnskóla frá útskrift. Hún hefur starfað í Hvassaleitisskóla í 14 ár þar sem hún hefur verið umsjónarkennari, teymisstjóri, verkefnastjóri, deildarstjóri, aðstoðarskólastjóri og er nú starfandi skólastjóri.
Iðunn Pála hefur í störfum sínum veitt faglega forystu á sviði kennslu og þróunar í skólastarfi og hefur sýnt fram á góða hæfni á því sviði. Hún hefur verið farsæll kennari og skólastjórnandi í Hvassaleitisskóla. Hún þekkir vel starfssemi skólans og þarfir skólaumhverfisins og hefur í störfum sín um sýnt mikla leiðtoga- og stjórnunarhæfni.
Nýr skólastjóri Langholtsskóla
Sigurlaug Hrund hefur lokið grunn- og framhaldsprófi í uppeldis- og menntunarfræðum og lauk kennslufræði til kennsluréttinda árið 2003. Hún hefur stundað framhaldsnám í stjórnunarfræðum menntastofnanna og er í diplómanámi um samþætta þjónustu í þágu farsældar barna.
Sigurlaug Hrund hefur víðtæka reynslu af vettvangi grunnskóla og málefnum barna. Síðastliðin þrjú ár hefur hún verið fagstjóri grunnskóla í skóla- og frístundadeild Suðurmiðstöðvar og verið næsti yfirmaður grunnskólastjóra í Breiðholti. Þá hefur hún meðal annars verið skólastjóri Fellaskóla í 5 ár, aðstoðarskólastjóri og skólastjóri Hamraskóla í samtals 9 ár og aðstoðarskólastjóri Austurbæjarskóla í eitt ár.
Sigurlaug hefur mikla stjórnunarreynslu og sýnt góða stjórnunarhæfileika og faglega forystu. Hún hefur fengist við fjölbreytt verkefni, leitt breytingar á skólastarfi og innleiðingu á verkefnum eins og Betri borg fyrir börn í Breiðholti.