Hjólasöfnun Barnaheilla - Save the Children á Íslandi var formlega hleypt af stokkunum í dag í Sorpu á Sævarhöfða. Dagur B. Eggertsson, borgarstjóri og Margrét María Sigurðardóttir, umboðsmaður barna, gáfu hjól til söfnunarinnar og hvöttu þannig aðra til að koma ónotuðum hjólum í notkun á ný.
Þetta er í fimmta sinn sem hjólasöfnunin fer fram en hún er unnin í samstarfi við Æskuna barnahreyfingu IOGT, Sorpu og ýmsa aðra velunnara. Pósturinn sér um móttöku hjóla á landsbyggðinni.
Hjólin verða gefin börnum og unglingum sem ekki hafa kost á því að kaupa sér reiðhjól. Hægt er að sækja um hjól hjá félagsþjónustu sveitarfélaganna.
Hjólunum verður safnað á endurvinnslustöðvum Sorpu á Dalvegi í Kópavogi, Breiðhellu í Hafnarfirði, Sævarhöfða, Ánanaustum og Jafnarseli í Reykjavík og Blíðubakka í Mosfellsbæ. Söfnunin stendur yfir til 30. apríl 2016 og úthlutanir fara fram í maí.
Sjálfboðaliðar munu gera hjólin upp undir styrkri stjórn sérfræðinga í reiðhjólaviðgerðum áður en þau verða afhent.
Hundruð barna hafa notið góðs af hjólasöfnun Barnaheilla frá því henni var fyst hrundið af stað árið 2012.
Hundruð barna hafa notið góðs af hjólasöfnun Barnaheilla frá því henni var fyst hrundið af stað árið 2012.
Hægt er að fylgjast með verkefninu á Facebook síðu söfnunarinnar og skrá sig þar til þátttöku í sjálfboðaliðastarf fyrir hjólaviðgerðir.