Borgarráð hefur heimilað umhverfis- og skipulagssviði að bjóða út framkvæmdir við gatnagerð fyrir svæði 1 á Ártúnshöfða. Áætlaður kostnaður áranna 2023-2025 er 2.323 m.kr.
Framkvæmdin felst í gerð gatna og veitukerfa fyrir nýtt íbúða- og þjónustuhverfi á núverandi iðnaðarsvæði á Ártúnshöfða. Um er að ræða upprif og förgun á núverandi yfirborði, losun klappar og lagnaskurða, jarðvegsskipti, gerð stoðveggja, lagningu fráveitu-, vatns- og hitaveitulagna, ásamt lagningu raf- og ljósleiðaralagna. Einnig gerð fyllinga og burðarlaga í götur, stíga og stéttar, ásamt uppsetningu götulýsingar og malbikunar.
Yfirborðsfrágangur gatna og borgarlands svæðisins er undanskilinn og verður boðinn út síðar í takti við uppbyggingarhraða byggðarinnar.
Verkkaupar eru umhverfis- og skipulagssvið Reykjavíkurborgar, Veitur ohf., Míla ehf. og Ljósleiðarinn ehf.