Frístundamiðstöðvar og menningarmiðstöðvar í Reykjavík bjóða upp á allskonar viðburði og sýningar í haustfríinu sem hefst í grunnskólum borgarinnar á morgun. Fullorðnir fá frítt inn í fylgd barna og ættu því öll að geta fundið sér eitthvað skemmtilegt til að brjóta upp hversdaginn.
Grímugerð, karókí og annað húllumhæ
Haustfrí í grunnskólum Reykjavíkur stendur yfir frá 26. til 30. október og er úrvalið á viðburðum, sýningum og smiðjum fjölbreytt og spennandi. Í frístundamiðstöðvunum er boðið upp á allskyns afþreyingu eins og hrekkjavökugleði, klifur, hjólreiðar, ratleiki, föndur og útigrill.
Listasöfn borgarinnar verða einnig opin og bjóða að auki upp á skemmtilegar listasmiðjur, kynningar og leiðsögn. Borgarbókasöfnin verða líka með allskonar húllumhæ. Til dæmis má nefna fiskivatnslitasmiðju, hrekkjavökugrímugerð, karókí, DragStund, barmmerkjagerð, sögustund og ýmsar þrautir.
