Skörp forgangsröðun og áframhaldandi aðhald einkennir fjárhagsáætlun fyrir A-hluta borgarinnar fyrir árið 2025 þar sem gert er ráð fyrir 1,7 milljarða króna afgangi af rekstri. Útkomuspá sýnir rekstrarafgang upp á ríflega hálfan milljarð króna á þessu ári og áætlanir gera ráð fyrir að rekstur borgarinnar batni enn frekar næstu fimm árin. Rekstur samstæðu (A- og B- hluta) skilar 14,3 milljarða afgangi árið 2025 samkvæmt áætlunum.
Frumvarp að fjárhagsáætlun Reykjavíkurborgar fyrir árið 2025 og fimm ára tímabilið til 2029 er lögð fram í borgarstjórn til fyrri umræðu í dag.
1,7 milljarða króna rekstrarafgangur A-hluta 2025
Fjárhagsáætlun A-hluta (hluti reksturs Reykjavíkurborgar sem fjármagnaður er með skatttekjum) sýnir mikinn viðsnúning í rekstri sem má rekja til árangurs af aðhaldi og aðgerðum til að mæta hallarekstri síðustu ára í samræmi við markmið og megináherslur fjármálastefnu Reykjavíkurborgar sem var sett fram við upphaf kjörtímabilsins.
Á næsta ári er gert ráð fyrir að rekstrarniðurstaða verði jákvæð um 1,7 milljarða króna. Gert er ráð fyrir að eignir A-hluta nemi 304 milljörðum króna í lok árs 2025 og aukist um 12,4 milljarða króna milli ára.
Útkomuspá gerir ráð fyrir að rekstrarniðurstaðan ársins 2024 verði jákvæð um 531 milljón króna sem er um 5,5 milljarða króna jákvæður viðsnúningur frá fyrra ári.
14,3 milljarða króna jákvæð niðurstaða samstæðu 2025
Fjárhagsáætlun ársins 2025 gerir ráð fyrir að rekstrarniðurstaða A- og B- hluta verði jákvæð um 14,3 milljarða króna og EBITDA (afkoma fyrir vaxtagreiðslur og vaxtatekjur, skattgreiðslur og afskriftir) verði 62,6 milljarðar króna.
Á árunum 2026-2029 er gert ráð fyrir batnandi afkomu A- og B- hluta og vaxandi EBITDA. Gert er ráð fyrir að í lok árs 2025 nemi eignir samtals 1.028 milljörðum króna og aukist um 54,2 milljarða á árinu. Þá er gert ráð fyrir að eiginfjárhlutfall nemi 45,7%.
Útkomuspá fyrir árið 2024 gerir ráð fyrir að afkoma samstæðunnar A- og B- hluta verði jákvæð um 8,1 milljarða króna á árinu.
Fjárhags- og fimm ára áætlun gerir ráð fyrir að þriggja ára jafnvægisviðmið sveitarstjórnarlaga verði jákvætt allt áætlunartímabilið og skuldaviðmið undir lögskyldu hámarki.
Fjárfest til framtíðar
Reykjavíkurborg hefur sett í forgang umfangsmikið viðhaldsátak á skólabyggingum, bæði leik- og grunnskóla. Áætlun næstu 5 til 7 árin hljóðar upp á 30 til 35 milljarða króna bæði í viðgerðum á skólahúsnæði og uppbyggingu til að fjölga leikskólaplássum. Að auki er lögð áhersla á viðhald og uppbyggingu íþróttamannvirkja sem nýtast börnum og ungmennum í borginni.
Hröð húsnæðisuppbygging
Eitt af höfuðmarkmiðum Reykjavíkurborgar er að hraða húsnæðisuppbyggingu. Fjármunum er forgangsraðað til uppbyggingar gatna- og veituinnviða fyrir nýjar íbúðir en líka atvinnustarfsemi. Áhersla er á að byggja á þeim svæðum sem styðja við virka ferðamáta og almenningssamgöngur en einnig ryðja nýtt land og styrkja úthverfin með aukinni byggð. Sett hafa verið markmið um að hafa tiltækar byggingarhæfar lóðir fyrir allt að 1500 – 3000 íbúðir á hverjum tíma. Í dag eru yfir 2600 íbúðir í byggingu og byggingarhæfar lóðir fyrir 2662 íbúðir til viðbótar.
Lykill að góðri þjónustu er ábyrgur rekstur
„Fjárhagsáætlunin sem við kynnum í dag sýnir að við höfum með samhentum hætti náð miklum árangri við krefjandi ytri aðstæður,” segir Einar Þorsteinsson borgarstjóri. „Lykillinn að því að geta veitt borgarbúum góða þjónustu er að reka borgina með ábyrgum hætti.”
Borgarstjóri segir að skýrt rekstraraðhald sé að skila árangri. Meginmarkmiðið sé að standa vörð um grunnþjónustuna en leita hagræðingartækifæra inn á við. Þá hafi öflugt aðhald meðal annars skilað sér í því að stöðugildi borgarinnar standi í stað milli ára þrátt fyrir að íbúum fjölgi og þjónusta við borgarbúa sé bætt.
„Þrátt fyrir að okkur hafi tekist að snúa miklum hallarekstri yfir í að skila núna afgangi þá erum við meðvituð um að verkefninu er ekki lokið. Við munum áfram leggja okkur fram um að leita leiða til að bæta reksturinn og þannig skapa svigrúm til þess að bæta enn frekar þjónustu við íbúa”.