Reykjavíkurborg birtir nú nýtt mælaborð sem sýnir áhrif Covid-19 faraldursins á starfsemi borgarinnar.
Reykjavíkurborg hefur sett í loftið nýtt mælaborð sem sýnir í tölum áhrif Covid-19 faraldursins á starfsemi borgarinnar. Í mælaborðinu birtast tölur um fjölda starfsfólks í sóttkví og einangrun. Tölurnar eru brotnar niður eftir fagsviðum og skrifstofum.
Síðan verður uppfærð tvisvar sinnum í viku með nýjustu tölum. Einnig verður síðan í stöðugri þróun á næstu dögum og má vænta frekari greininga og upplýsinga á henni.
Talsverð vinna felst í því að halda utan um gögnin á þeim sviðum sem hafa flest starfsfólkið eins og skóla- og frístundasvið og velferðarsvið en mikið mæðir á þeim í Covid-19 faraldrinum. Vinnur mannauðs- og starfsumhverfissvið í nánu samstarfi við þessa aðila að söfnun gagnanna.
Gagnaþjónusta Reykjavíkur, sem sér um hagnýtingu gagna og greiningar fyrir Reykjavíkurborg hefur unnið að gerð síðunnar.