Vitundarvakning um sýklalyfjaónæmi – Skissum sýklalyfjaónæmi
Um helgina var opnuð sýning á sýningastöndum í Austurstræti sem ber heitið Skissum sýklalyfjaónæmi. Sýningin er liður í alþjóðlegri vitundarvakningu um sýklalyfjaónæmi og mikilvægi þess að varðveita virkni sýklalyfja fyrir komandi kynslóðir.
30 listamenn, þar á meðal Hugleikur Dagsson, fjalla með skapandi og myndrænni framsetningu um sýklalyfjaónæmi og áhrif þess á lýðheilsu, samfélög og vistkerfi um allan heim. Listamennirnir gera þetta flókna viðfangsefni aðgengilegra fyrir almenning og benda um leið á mikilvægi þess að vernda virkni sýklalyfja til framtíðar og er yfirskrift sýningarinnar Skissum sýklalyfjaónæmi.
Verkin verða sýnd utandyra á sýningarstöndum í Austurstræti í sumar og gefa vegfarendum þannig tækifæri til að staldra við í daglegu amstri og upplifa sýninguna í almannarými. Embætti landlæknis, og Sóttvarnarlæknir eru í forsvari fyrir átakinu hérlendis.
Sýklalyfjaónæmi – vaxandi alþjóðlegt vandamál
Eitt af mikilvægustu verkefnum samtímans er að varðveita virkni sýklalyfja fyrir komandi kynslóðir. Ef það á að takast þarf að ráðast í víðtækar aðgerðir og setja metnaðarfull markmið í baráttunni við útbreiðslu sýklalyfjaónæmis. Sýklalyfjaónæmi er vaxandi alþjóðlegt vandamál og er ein stærsta heilbrigðisógn sem heimurinn stendur frammi fyrir í dag.
Ísland tekur þátt í verkefninu EU-JAMRAI 2, sem er sameiginlegt átak Evrópuríkja gegn sýklalyfjaónæmi og sýkingum tengdum heilbrigðisþjónustu (e. European Joint Action on Antimicrobial Resistance and Healthcare-Associated Infections). Sýningin í Austurstræti er liður í alþjóðlegu átaki á vegum samtakanna.