Reitir og Hjallastefnan sameinast um nýjan leik- og grunnskóla við Nauthólsveg

Ritstjórn
Þau sem koma að uppbyggingunni standa á byggingarlóðinni fyrir framan Hótel Natura.

Reitir og Hjallastefnan hafa undirritað viljayfirlýsingu um samstarf um þróun og uppbyggingu nýs leik- og grunnskóla í fyrirhuguðum lífsgæðakjarna við Nauthólsveg í Reykjavík. Áformað er að skólinn verði fyrir um 400 börn í leikskóla og í grunnskóla frá 1. og upp í 7. bekk. 

Samstarfið markar tímamót fyrir Hjallastefnuna í Reykjavík, sem hefur verið í húsnæðisóvissu um nokkurt skeið. Frá því fyrstu nemendur hófu nám í grunnskóla Hjallastefnunnar árið 2006 og var starfsemin lengst af við Nauthólsveg 89. Hjallastefnan þurfti hins vegar að víkja þegar Háskólinn í Reykjavík hóf uppbyggingu á lóðinni sem er í eigu háskólans. Síðan hefur skólinn starfað í tímabundnu húsnæði við Skógarhlíð sem og í Háuhlíð í húsnæði skátafélagsins Landnema en í dag eru nemendur á miðstigi í Arnarhlíð 1.

Hönnunarmynd af fyrirhugðum byggingum við Nauthólsveg.
Hönnunarmynd af fyrirhugaðri skólabyggingu og lífsgæðakjarna við Nauthólsveg.

Stuðningur borgarinnar mikilvægur

„Samstarfið er lykilstef í að tryggja gott húsnæði undir skólastarf Hjallastefnunnar til framtíðar. Skóla- og frístundasvið Reykjavíkurborgar hefur sýnt verkefninu mikinn áhuga og veitt góðan stuðning en án stuðnings borgarinnar við starfsemi og uppbyggingu sjálfstæðra skóla værum við ekki hægt að fagna þessum áfanga,“ segir í sameiginlegri fréttatilkynningu Hjallastefnunnar og Reita. 

Við undirritun viljayfirlýsingar í dag. Á mynd eru bæði fullorðnir og börn.
Margrét Pála Ólafsdóttir höfundur Hjallastefnunnar, Frans Páll Sigurðsson fjármálastjóri skóla- og frístundasviðs og Hildur Björnsdóttir borgarstjóri.

Náið samfélag kynslóða

Nýi skólinn verður hluti af stærri uppbyggingu svonefnds lífsgæðakjarna sem Reitir hyggjast reisa við Nauthólsveg. Þar er gert ráð fyrir fjölbreyttri byggð, meðal annars um 150 íbúðum, einkum fyrir íbúa 60 ára og eldri, auk verslunar, þjónustu, hjúkrunarheimilis og sameiginlegra rýma. Hugmyndafræðin að baki verkefninu sækir innblástur til svokallaðrar þveraldursbúsetu, þar sem mismunandi aldurshópar búa og starfa saman í nánu samfélagi.

Samkvæmt kynningu Reita er markmiðið að stuðla að aukinni félagslegri virkni og vellíðan íbúa með samnýtingu rýma, góðum tengingum og aðlaðandi útisvæðum. Garðar, torg og yfirbyggð útirými verða lykilþættir í skipulaginu og ætlað að draga úr félagslegri einangrun og efla samfélagstilfinningu.

Hjallastefnan leggur áherslu á jafnrétti, lýðræði og sköpun í starfi sínu og starfrækir í dag tólf leikskóla og þrjá grunnskóla í samstarfi við tíu sveitarfélög. Um 1.650 börn stunda þar nám og starfsmenn eru um 550 talsins. Þá eru einnig fleiri leikskólar reknir undir merkjum stefnunnar í sjálfstæðum rekstri.

Börn og fullorðin mynduðu hring á lóðinni.
Viðstödd mynduðu hring á lóðinni.

Hugmyndafræði beggja samrýmanleg

Að sögn forsvarsmanna Hjallastefnunnar fellur nýr skóli vel að hugmyndafræði bæði félagsins og hins fyrirhugaða lífsgæðakjarna. Áhersla á umhverfisvæna mannvirkjagerð, samfélagslega samveru og tengsl milli kynslóða styður við þá menntastefnu sem Hjallastefnan byggir á.

Ef áformin ganga eftir mun nýi skólinn ekki aðeins leysa langvarandi húsnæðisvanda, heldur einnig verða hluti af nýrri nálgun í borgarþróun þar sem menntun, búseta og þjónusta fléttast saman í lifandi og fjölbreyttu nærumhverfi.