Opið fyrir umsóknir um styrki til myndríkrar miðlunar um sögu Reykjavíkur
Ert þú með bók, kvikmynd, sjónvarpsefni, vefsíðu eða aðra miðlun í undirbúningi sem tengist sögu Reykjavíkur og hyggst nota ljósmyndir Ljósmyndasafns Reykjavíkur í verkefninu? Þá getur þú sótt um styrk til Reykjavíkurborgar vegna kaupanna. Styrkurinn felst í niðurgreiðslu á kostnaði vegna myndbirtinga.
Rithöfundar, útgefendur og aðrir sem hyggja á myndríka miðlun á árinu 2026 eða í ársbyrjun 2027 um efni sem tengist sögu Reykjavíkur geta sótt um styrkinn. Styrkurinn er í formi inneignar til kaupa á ljósmyndum til birtingar frá Ljósmyndasafni Reykjavíkur, að hluta eða heild.
Markmið styrkveitingarinnar er stuðla að öflugri miðlun menningararfleifðar Reykjavíkur og sögu hennar. Hópur skipaður þremur sérfræðingum á menningar- og íþróttasviði Reykjavíkurborgar fer yfir umsóknir og gerir tillögu til menningar-, íþrótta- og tómstundaráðs um val á umsækjendum.
Umsóknarfrestur er til og með sunnudagsins 31. maí 2026.
Í umsókn um styrk til myndríkrar miðlunar þurfa að koma fram upplýsingar um umsækjanda ásamt lýsingu á fyrirhugaðri útgáfu. Einnig skal fylgja verðáætlun Ljósmyndasafns Reykjavíkur vegna fyrirhugaðra kaupa á ljósmyndum sem bera birtingagjald skv. gjaldskrá safnsins. Sótt er um styrkinn á Mínum síðum Reykjavíkurborgar.