Listahátíð í Reykjavík sett á morgun með glæsilegri dagskrá
Listahátíð í Reykjavík verður sett í Listasafni Reykjavíkur á morgun, laugardaginn 30. maí, klukkan 14. Framundan er spennandi dagskrá og stendur hátíðin til 14. júní.
Hátíðin, sem fer fram annað hvert ár, er nú haldin í 35. sinn. Listahátíð er vettvangur fyrir listsköpun í hæsta gæðaflokki frá öllum heimshornum en á líka í kröftugu og lifandi sambandi við almenning í landinu og leitast við að tendra áhuga sem flestra til að taka þátt og njóta lista á eigin forsendum. Listahátíð fagnar fjölbreytileika mannlífsins og setur aðgengi og virðingu fyrir umhverfinu í forgang. Við verkefnaval hefur hátíðin faglegan metnað, kjark, lífsgleði og stórhug að leiðarljósi.
Opnunardagurinn á morgun verður stútfullur af spennandi og fjölbreyttum viðburðum og mun Heiða Björg Hilmisdóttir borgarstjóri setja hátíðina. Opnunarhátíðin hefst í Listasafni Reykjavíkur, Hafnarhúsi, þar sem boðið verður upp á brot úr nokkrum viðburðum hátíðarinnar, ávörp og léttar veitingar. Samhliða verður opnuð yfirlitssýning á verkum þýsku listakonunnar Karin Sander. Í kjölfarið leiða Skólahljómsveitir Reykjavíkur borgarbúa að Hörputorgi þar sem frumflutningur á tónverkinu Loftvægi eftir Samúel Jón Samúelsson fer fram, en í verkinu sameinast skólahljómsveitirnar fjórar, hátt í 600 ungmenni.
Frumsýning á loftfimleika-dansverkinu The Air Between Us hefst klukkan 15:30 á Hörputorgi og verður sýnt aftur klukkan 17. Sinfóníuhljómsveit Íslands flytur eitt stærsta sinfóníska verk sögunnar, áttundu sinfóníu Mahlers, á tónleikum klukkan 17 og á sama tíma kynnir Fischersund ilmheim hátíðarinnar í gróðurhúsinu á Lækjartorgi. Sýningar James Merry og Bjarkar Guðmundsdóttur verða opnaðar í Listasafni Íslands klukkan 18 og svo er tilvalið að enda daginn í opnunarpartýi Klúbbs Listahátíðar í Iðnó þar sem danssýningin Move with Pride fer fram klukkan 21:00.
Verið hjartanlega velkomin á Listahátíð í Reykjavík 2026!
