Jólakötturinn mætir á Lækjartorg - Oslóartréð fellt í Heiðmörk
Laugardaginn 14. nóvember klukkan 17:00 verður kveikt á ljósunum á jólakettinum á Lækjartorgi.
Hildur Björnsdóttir, borgarstjóri, flytur stutta ræðu og fær aðstoð við að kveikja á jólakettinum. Grýla og Leppalúði ætla að mæta í bæinn sérstaklega til að vera viðstödd tendrun heimiliskattarins og munu svo væntanlega bregða á leik. Lúðrasveitin Svanur mun flytja nokkur jólalög svo allir komist í jólaskap.
Kötturinn er um fimm metrar á hæð, sex metrar á breidd og er lýstur upp með 6500 led ljósum. Jólakötturinn var settur upp í fyrsta sinn árið 2018 og hefur ávallt vakið mikla athygli gesta og gangandi á torginu. Hönnun jólakattarins er samstarf Reykjavíkurborgar, MK-Illumination í Austurríki og fyrirtækisins Garðlist.
Jólakötturinn er ein af íslensku jólavættunum. Hann er gríðarstór, eins og segir í löngu kvæði Jóhannesar úr Kötlum um þessa óvætt sem er sögð leggja sér þá til munns sem ekki fá nýja flík fyrir jólin.
Athygli er vakin á því að jólamarkaðurinn á Austurvelli opnar kl. 13:00 laugardaginn 14. nóvember.
Oslóartréð fellt í Heiðmörk
Hildur Björnsdóttir, borgarstjóri mun fella Oslóartréð á skógræktarsvæði Skógræktarfélags Reykjavíkur í Heiðmörk laugardaginn, 14. nóvember næstkomandi, klukkan 11:00.
Borgarstjóri mun klæðast viðeigandi öryggisbúnaði og fær verkfæri til verksins og nýtur liðsinnis starfsmanns Skógræktarfélags Reykjavíkur. Um er að ræða um 50 metra hátt sitkagrenitré sem verður svo sett upp á Austurvelli og jólaljósin tendruð á trénu á fyrsta í aðventu þann 29. nóvember næstkomandi.
Hist verður við Elliðavatnsbæ klukkan 11:00 og keyrt þangað sem tréð stendur.
Boðið verður upp á léttar veitingar í boði norska sendiráðsins að loknu skógarhöggi.
