Fjárhagsáætlun Reykjavíkurborgar - rekstrarafgangur 2027 og niðurgreiðsla skulda 2028

Eftir 6,6 milljarða króna halla á þessu ári, samkvæmt útkomuspá, er gert ráð fyrir 2,8 milljarða afgangi á næsta ári, að borgin hefji niðurgreiðslu skulda árið 2028 og að fjárfestingargeta hennar styrkist ár frá ári. Áhersla er lögð á fjárfestingar í þágu grunnþjónustu, ekki síst barna og barnafjölskyldna.

Erfið staða í upphafi kjörtímabils

Nýr meirihluti tekur við erfiðu búi. Útkomuspá ársins 2026, sem byggir á fjárhagsáætlun fyrri meirihluta, gerir ráð fyrir 6,6 milljarða króna halla á rekstri A-hluta. Tekjur af byggingarrétti og gatnagerðargjöldum verða 6,4 milljörðum undir áætlun og handbært fé lækkar um 6,7 milljarða á árinu. Hreinar skuldir A-hluta hafa nærri tvöfaldast frá árinu 2021, úr 98 milljörðum í 195 milljarða króna.

Á sama tíma hefur viðhald skólahúsnæðis, íþróttamannvirkja, menningarhúsa, gangstétta og annarra innviða setið á hakanum. Það er því nauðsynlegt að treysta reksturinn svo styrkja megi fjárfestingagetu borgarinnar á næstu árum.

Viðsnúningur strax á næsta ári

Á næsta ári er áætlað að tekjur aukist um 5,6% en rekstrarútgjöld um 3,7%. Rekstrarafgangur aukist síðan ár frá ári og verði 16,8 milljarðar króna árið 2031. Stefnt er að því að launakostnaður, sem hlutfall af útsvars- og Jöfnunarsjóðstekjum, lækki í 74% árið 2027, en hann var 87% árin 2021 og 2022. 

Nýr meirihluti setur fram nýja fjármálastefnu sem byggir á sjálfbærni og stöðugleika í rekstri borgarinnar til lengri tíma. Með fjármálastefnunni eru sett strangari fjárhagsleg markmið fyrir rekstur borgarinnar og stefnt að því að öll markmið verði uppfyllt á árunum 2027 til 2031.

Hagræðing skilar 2,3 milljörðum á ári

Fyrirliggjandi hagræðingaraðgerðir meirihlutans, sem falið hafa í sér fækkun starfsmanna í miðlægri stjórnsýslu um 130 stöðugildi, leiða til þess að launakostnaður lækkar um 2,3 milljarða á ársgrundvelli. Áhersla er á að verja framlínustörf í þjónustu við íbúana.  Í fyrsta sinn er sett viðmið um yfirbyggingu: miðlæg stöðugildi verði að hámarki 7,5% af heildarstöðugildum borgarinnar, en þau voru 8,4% í júní. Næstu verkefni hagræðingarhóps munu snúa að því að rýna eignasafn borgarinnar, veikindahlutföll starfsmanna og innkaupamál.

Skuldir greiddar niður á kjörtímabilinu

Frá og með árinu 2028 hefjist skipuleg niðurgreiðsla skulda. Á árunum 2027 til 2031 greiði borgin 16,4 milljörðum króna meira af lánum en hún tekur að láni. Áætlað er að skuldaviðmið A-hluta lækki úr 86% í 73% og stofnaður verður varúðarsjóður til að mæta verulegum áföllum.

Sterkari fjárfestingargeta – börn og fjölskyldur í forgangi

Áætlað er að veltufé frá rekstri, sem stendur undir afborgunum og fjárfestingum, aukist úr 18 milljörðum árið 2027 í tæpan 31 milljarð árið 2031. Fjárfestingar nema 23,6 milljörðum króna á næsta ári og aukast í 25,6 milljarða árið 2031.

Áherslan í fjárfestingaáætlun 2027 verður á viðhald leik- og grunnskóla, uppbyggingu nýrra leikskóla í samstarfi við einkaaðila, viðhald og uppbyggingu íþróttamannvirkja, viðhaldsátak á gangstéttum, Vetrargarð í Breiðholti og öflugri leiksvæði fyrir börn. Einnig verður fjárfest í sundlaugum, snjallri umferðarljósastýringu, heitum stígum, hjólastígum og grænni borg, meðal annars með skógræktarátaki þar sem að minnsta kosti 50 þúsund trjáplöntum verður plantað með þátttöku barna.

Frumvarpinu verður vísað til annarrar umræðu í borgarstjórn 1. desember 2026. 

Tilkynning til Kauphallar 3. nóvember 2026

Fjárhagsáætlun 2027 - yfirlit