Bríetar Bjarnhéðinsdóttur minnst í Hólavallagarði á kvenréttindadaginn

Ritstjórn
Vinkonurnar þær Jóný Helgadóttir og Nína Melkorka Ólafsdóttir báru kransinn að leiði Bríetar Bjarnhéðinsdóttur í Hólavallagarði Róbert Reynisson
Vinkonurnar þær Jóný Helgadóttir og Nína Melkorka Ólafsdóttir báru kransinn að leiði Bríetar Bjarnhéðinsdóttur í Hólavallagarði

Það var falleg minningarstund í Hólavallagarði í morgun, á kvenréttindadaginn, þegar Bríetar Bjarnhéðinsdóttur, kvenréttindakonu og fyrrverandi bæjarfulltrúa var minnst.

Minningarstund um Bríeti Bjarnhéðinsdóttur, kvenréttindakonu og bæjarfulltrúa, fór fyrst fram á kvenréttindadaginn árið 2011 og hefur verið árviss viðburður síðan þá. Það var ákaflega fallegt veður og sólin skein á gestina sem voru komnir á minningarathöfnina í Hólavallagarði í morgun. 

Sigrún Erla Grétarsdóttir, söngkona söng tvö lög. Björg Magnúsdóttir, forseti borgarstjórnar hlýðir á.
Sigrún Erla Grétarsdóttir, söngkona, söng tvö lög. Björg Magnúsdóttir, forseti borgarstjórnar, hlýðir á.

Athöfnin hófst á tónlist sem Sigrún Erla Grétarsdóttir söngkona og Vignir Þór Stefánsson tónlistarmaður, sáu um. Tvær ungar stúlkur þær Nína Melkorka Ólafsdóttir og Jóný Helgadóttir báru blómsveig að leiði Bríetar.

Björg Magnúsdóttir, forseti borgarstjórnar, flytur ræðu í Hólavallagarði. Þær Jóný og Nína fylgjast með.

Björg Magnúsdóttir, forseti borgarstjórnar, tók við blómsveignum og lagði á leiði Bríetar. Hún flutti svo stutt ávarp í tilefni dagsins.

Í lok athafnar, frá vinstri: Nína Melkorka Ólafsdóttir, Hildur Björnsdóttir, borgarstjóri, Jóný Helgadóttir og Björg Magnúsdóttir, forseti borgarstjóranar.
Í lok athafnar, frá vinstri: Nína Melkorka Ólafsdóttir, Hildur Björnsdóttir, borgarstjóri, Jóný Helgadóttir og Björg Magnúsdóttir, forseti borgarstjóranar.

Baráttukona fyrir bættum kjörum kvenna 

Bríet Bjarnhéðinsdóttur átti ríkan þátt í að koma á réttarbótum konum til handa og efla þannig lýðræðissamfélagið í heild sinni. Hún var stofnandi Kvenréttindafélags Íslands árið 1907 og var fyrsti formaður félagsins frá stofnun allt til ársins 1928. Markmið félagsins var að starfa að því að íslenskar konur fengju fullt stjórnmálajafnrétti á við karlmenn, kosningarétt, kjörgengi svo og embættisgengi og rétt til atvinnu með sömu skilyrðum og karlmenn. 
Blómakransinn á leiði Bríetar Bjarnhéðinsdóttur í Hólavallagarði
Blómakransinn á leiði Bríetar Bjarnhéðinsdóttur í Hólavallagarði

Konur í Reykjavík buðu fram sérstakan Kvennalista fyrir bæjarstjórnarkosningar árið 1908 og var það fyrsta sérframboð kvenna á Íslandi. Kvennalistinn vann stórsigur, kom öllum sínum fulltrúum að. Konurnar fjórar, þær fyrstu sem settust í bæjarstjórn Reykjavíkur, voru Bríet Bjarnhéðinsdóttir, Guðrún Björnsdóttir, Katrín Magnússon og Þórunn Jónassen. Málin sem þær börðust fyrir í bæjarstjórn voru meðal annars sundkennsla, fyrir bæði kynin, og leikvellir fyrir börn. Vegna mikillar fátæktar í bænum voru mörg börn vannærð. Bríet beitti sér fyrir því í bæjarstjórn að börn fengju mat í skólanum. Matargjafir komust á og var þeim haldið áfram af og til fram á fjórða áratuginn. Bríet lést í Reykjavík árið 1940.