Börn og eldri borgarar mynda dýrmæt tengsl
Hópur leikskólabarna úr Hálsaskógi hefur hitt eldri borgara í Seljahlíð einu sinni í viku frá því í ágúst vegna verkefnis sem miðar að því að styrkja tengsl kynslóða. Þegar verkefnið hófst þekktust hóparnir lítið sem ekkert, en á fáum mánuðum hafa myndast sterk og kærkomin tengsl sem hafa jákvæð áhrif á bæði börnin og eldri þátttakendur.
Skutlur og boltar ofarlega á vinsældarlistanum
Nú í júní fóru börnin í Seljahlíð og gróðursettu sumarblóm með íbúunum þar en samverustundirnar byggjast á ýmis konar samveru. Þegar börnin og íbúarnir hittast er áhersla lögð á léttleika og gleði en ekki stífa dagskrá. Börnin sækja sérstaklega í leiki sem byggja á hreyfingu eins og að kasta boltum og skutlum til eldri borgaranna, sem taka virkan þátt. Stundirnar skapa gleði og stuðla að aukinni samhæfingu og virkni allra þátttakenda.
Byggja upp orðaforða í heimsóknunum
Þá er vinsælt að syngja saman kunnugleg lög, svo sem Fljúga hvítu fiðrildin og Afi minn og amma mín. Börnin fá tækifæri til að deila því sem þau læra í leikskólanum. Áhrif verkefnisins eru víðtæk. Fyrir eldri borgara er samveran líflegur og kærkominn hluti af daglegu lífi, sérstaklega fyrir þá sem eiga ekki börn eða barnabörn nærri. Fyrir börnin felur þátttakan í sér dýrmætan lærdóm; þau þjálfa málnotkun, bæta orðaforða og æfa fínhreyfingar. Þá læra þau einnig að sýna samkennd og virðingu í samskiptum við þau sem eldri eru.
Ekki öll eiga ömmu og afa í næsta nágrenni
Verkefnið tekur einnig mið af fjölbreyttu samfélagi því mörg börn af erlendum uppruna hafa ekki aðgang að ömmum og öfum í nærumhverfi sínu. Með þátttöku sinni fá þau tækifæri til að kynnast eldra fólki og mynda tengsl sem annars gætu ekki orðið.
Heimsóknirnar efla félagsfærni barnanna
Markmið verkefnisins er að byggja upp sterkari tengsl milli kynslóða með reglubundnum heimsóknum leikskólabarna til eldri borgara. Heimsóknirnar standa yfir í 30–40 mínútur í senn og er einmitt mikilvægt að sami hópur taki þátt yfir lengri tíma til að tryggja að tengsl nái að myndast og þróast.
Samkvæmt markmiðum menntastefnu Reykjavíkur 2025–2027 styður verkefnið við fjölbreyttari kennsluhætti, aukna hreyfingu barna og eflingu félagsfærni. Með því að skapa vettvang fyrir óformleg samskipti eru börn hvött til að lesa í aðstæður, sýna umhyggju og taka þátt í lifandi samfélagi.