Þrjú hundruð sjúkraliðar af landinu öllu komu saman
Um þrjú hundruð sjúkraliðar af landinu öllu voru mættir í Hörpu á mánudaginn, þar sem Sjúkraliðadagurinn var haldinn með innihaldsríkri dagskrá og fjölda fyrirlesara, frá morgni og fram á seinnipart dags.
Samstaðan er okkar sterkasta afl
Það voru Sjúkraliðafélagið, Reykjavíkurborg, Landspítalinn og Framvegis – miðstöð símenntunar, sem stóðu sameiginlega að deginum. „Það var virkilega gaman að sjá þessa aðila standa sameiginlega að þessum viðburði. Það er frábært fyrir okkur sjúkraliða að finna þennan vilja til samvinnu. Við vitum líka að samstaðan er okkar sterkasta afl,“ segir Sandra B. Franks, formaður Sjúkraliðafélags Íslands.
Vettvangur til að varpa ljósi á eina stærstu heilbrigðisstétt landsins
Sandra segir dag sem þennan skipta miklu máli til að skapa sameiginlega faglega sýn innan stéttarinnar. „Það hefur stundum loðað við í kerfinu að við séum „bara“ sjúkraliðar. Ég bind vonir við að með svona glæsilegri ráðstefnu náum við að lyfta stéttinni og varpa ljósi á það kjarnastarf í hjúkrun sem við sjúkraliðar erum að sinna, sem er gríðarlega mikilvægt. Smám saman náum við vonandi að móta almenna þekkingu á störfum okkar í samfélaginu. Alltof margir átta sig ekki á því hvað sjúkraliðar fást við í störfum sínum.“
Hún segir skilin milli sjúkraliða og hjúkrunarfræðinga oft óljós, ekki síst fyrir þann sem þiggur þjónustuna. Í meginatriðum megi segja að sjúkraliðar beri hitann og þungann af nærhjúkrun, þar sem þeir eru í mestri nánd við fólk, meðan hjúkrunarfræðingar sjá um skipulagningu hjúkrunaráætlunar og sinna tengslum við aðra fagaðila. „Hvort tveggja er þetta mikilvægt.“
Viðbótarnám í sjúkraþjálfun mikilvæg fyrir starfsþróunarmöguleika sjúkraliða
Það er eitt af baráttumálum Sjúkraliðafélagsins að styðja við starfsþróun sjúkraliða og segir Sandra að í því samhengi hafi gríðarlega mikilvægt skref verið tekið þegar Háskólinn á Akureyri byrjaði með diplómanám fyrir starfandi sjúkraliða. Lengi hafi félagið barist fyrir tilkomu þess, enda stuðli það að því að fleiri velji að ævistarfi að vera sjúkraliðar. „Næsta skref er þá að stjórnendur heilbrigðisstofnana skapi viðeigandi störf fyrir fólk sem leggur á sig að fara í gegnum þetta viðbótarnám.“
Aukin samstaða mikið fagnaðarefni
Dagskrá Sjúkraliðadagsins var sem fyrr segir afar fjölbreytt. Fyrir hádegi var fjallað um árangursríka heimahjúkrun, vannæringu eldra fólks og verkefni Sorgarmiðstöðvar. Eftir hádegi var fjallað um fyrrnefnt fagnám til diplómaprófs fyrir starfandi sjúkraliða. Þá var fjallað um hæfniviðmið sjúkraliða, menningarnæmi, þrýstingssáravarnir, nýtingu velferðartækni og mikilvægi jákvæðra samskipta.
Fjögur ávörp voru flutt í upphafi dags. Þar tóku til máls Sandra B. Franks, formaður Sjúkraliðafélagsins, Eygló Ingadóttir verkefnastjóri fyrir hönd Landspítalans og Sanna Magdalena Mörtudóttir, formaður velferðarráðs, fyrir hönd Reykjavíkurborgar. Þá ávarpaði Alma Möller heilbrigðisráðherra ráðstefnuna með myndbandi en hún er í opinberri heimsókn með forseta Íslands og gat því ekki mætt í eigin persónu.
„Alltof margir átta sig ekki á því hvað sjúkraliðar fást við í störfum sínum.“
Öllum bar þeim sem ávörpuðu samkomuna saman um mikilvægi sjúkraliða innan heilbrigðiskerfisins, ekki síst nú á tímum, þegar sjúklingum með flóknari heilbrigðisvanda fer fjölgandi, með tilheyrandi þyngri umönnun og sífellt meira krefjandi verkefnum. Sjúkraliðar, sem séu önnur fjölmennasta heilbrigðiskerfisins, starfi í mikilli nálægð við fólk og á þá reyni að svo marga vegu, meðal annars á samskiptahæfni, andlegan styrk og líkamlega burði. Öll fögnuðu þau aukinni samheldni sjúkraliða, sem berjist í auknum mæli fyrir faglegri viðurkenningu, bættum kjörum og betri aðbúnaði í starfi.