Áhrif kjarasamninga vega þungt í 6 mánaða uppgjöri Reykjavíkurborgar
Árshlutareikningur Reykjavíkurborgar fyrir tímabilið janúar-júní 2025 var lagður fram í borgarráði í dag. Rekstur A-hluta var í jafnvægi á tímabilinu, þrátt fyrir kjarasamningsbundnar launahækkanir og áhrif þeirra á gjaldfærslu lífeyrisskuldbindingar.
Rekstur borgarinnar í jafnvægi
Rekstrarniðurstaða A-hluta, sem er sá rekstur sem er fjármagnaður með skatttekjum, var í jafnvægi á tímabilinu. Grunnreksturinn, það er rekstrarniðurstaða fyrir fjármagnsliði og afskriftir (EBITDA), sýndi jákvæða niðurstöðu um 3,3 milljarða króna sem er um 600 milljónum minni afgangur en gert var ráð fyrir í áætlun. Rekstrarniðurstaða eftir fjármagnsliði og afskriftir var neikvæð um 47 milljónir króna.
Áhrif kjarasamningsbundinna launahækkana koma fram í gjaldfærslu lífeyrisskuldbindingar R-deildar Brúar lífeyrissjóðs sem er nú metin umtalsvert hærri en upprunaleg áætlun gerði ráð fyrir. Þessi breyting sem er um 3,7 milljörðum umfram áætlanir vegur þungt í árshlutauppgjörinu.
Á móti kemur að útsvarstekjur hafa verið sterkari en áætlað var, auk þess sem sala eigna er umfram upprunalegar áætlanir.
Veltufé frá rekstri nam 10,4 milljarðar króna og var 10% í hlutfalli af tekjum tímabilsins.
Rekstur samstæðu jákvæður um ríflega 5 milljarða
Rekstrarniðurstaða samstæðunnar, A- og B-hluta, var jákvæð um 5,1 milljarða króna sem var 4,7 milljörðum betri niðurstaða en á sama tímabili árið 2024. Rekstrarniðurstaða var 1,6 milljarði króna betri en áætlað var. Matsbreyting fjárfestingaeigna hjá Félagsbústöðum hefur jákvæð áhrif á niðurstöður, en hún var 3,3 milljörðum króna yfir fjárhagsáætlun.
Enn talsverð óvissa í efnahagsumhverfi
Stærstu áhættur eru tengdar áhrifum verðbólgu á vaxtastig, gengis krónunnar og óvissu á alþjóðavettvangi. Verðbólga hefur reynst þrálát og hefur Seðlabankinn viðhaldið háum stýrivöxtum til að hemja verðbólgu og draga úr eftirspurnarþrýstingi. Hátt vaxtastig hefur aukið við fjármagnskostnað borgarinnar, en getur jafnframt aukið kostnað borgarinnar í gegnum neikvæð áhrif þess á skuldug heimili og fyrirtæki.
Raungengi krónunnar hefur styrkst verulega það sem af er ári, um 7%, en það endurspeglar bæði hraða styrkingu krónunnar og hátt innlent verðlag. Þá eru blikur á lofti í alþjóðlegum efnahagsmálum, einkum vegna viðskiptadeilna og stríðsátaka. Óvissa er um hvaða áhrif þessir þættir muni hafa á innlent hagkerfi.
Samkomulag milli ríkis og sveitarfélaga vegna reksturs á sérhæfðri þjónustu við börn með fjölþættann vanda kom til framkvæmda frá og með 1. júní síðastliðnum og felur í sér að ríkið tekur yfir ábyrgð og framkvæmd á þjónustunni. Ennþá vantar upp á fulla fjármögnun á málaflokki fatlaðs fólks til framtíðar samanber skýrslu starfshóps ríkis og sveitarfélaga um kostnaðarskiptingu málaflokksins frá september 2024.
Í fjárhagsáætlun Reykjavíkurborgar 2025‐2029 sem samþykkt var þann 3. desember síðastliðinn eru áfram gerðar ríkar kröfur um aðhald í rekstri.