Umferðaröryggi verður bætt við Ánanaust og Eiðsgranda en meðal annars verða sett upp ný gönguljós og gerðar endurbætur á gönguþverun. Með þessu er einnig verið að bæta aðgengi gangandi og hjólandi vegfarenda en við sjóinn er vinsæl göngu- og hjólaleið.
Umhverfis- og skipulagsráð Reykjavíkurborgar samþykkti í morgun að veita heimild fyrir áframhaldandi undirbúningi, verkhönnun og gerð útboðsgagna, í samvinnu við Vegagerðina, sem er veghaldari á þessum götum. Íbúar hafa kallað eftir bættu aðgengi að stígum við ströndina auk þess sem umferðarslys sem orðið hafa á undanförnum misserum gefa tilefni til breytinga.
Hvað verður gert?
- Ný gönguljós á Eiðsgranda, vestan við innkeyrslu að Hringbraut 121.
- Akreinum vestur Eiðsgranda verður fækkað þannig að núverandi vinstribeygjuvasi verður fjarlægður og í staðinn verður núverandi vinstri akrein gerð að beygjuakrein.
- Tillagan gerir einnig ráð fyrir að ekki verði hægt að taka vinstri beygju frá Hringbraut 121 inn á Eiðsgranda.
- Settar verða upp miðeyjur á milli akreina í og úr hringtorginu. Þeim er ætlað að veita gangandi vegfarendum á leið yfir götuna skjól en tvær akreinar eru í hvora átt á Ánanaustum svo erfitt getur verið að átta sig á eða hafa yfirsýn yfir aðvífandi umferð.
Eins og áður segir er Vegagerðin veghaldari þarna en Ánanaust og Eiðsgrandi eru þjóðvegir í þéttbýli. Aðkoma Reykjavíkurborgar að væntanlegri framkvæmd felst í aðlögun og gerð stíga við gönguþveranirnar.
Skýringarmynd
