Borgarráð samþykkti í gær tillögur tilnefninganefndar um stjórnir einkaréttarlegra fyrirtækja borgarinnar. Tillögurnar taka mið af nýrri eigandastefnu þar sem áhersla er lögð á góða stjórnarhætti og þverpólitíska samstöðu.
Tillögurnar taka til skipan í stjórnir Orkuveitu Reykjavíkur, Félagsbústaða hf. og Faxaflóahafna sf. og hefur þeim verið vísað til borgarstjórnar sem mun taka þær fyrir á fundi næstkomandi þriðjudag. Kosning í fimm manna stjórn Félagsbústaða kallar á breytingu á samþykktum.
Samkvæmt eigandastefnunni skal í vinnu tilnefninganefndar litið til þess að stjórn, nefnd eða ráð sé hverju sinni saman sett af einstaklingum í sem jöfnustum kynjahlutföllum, sem hafa breiða þekkingu og bakgrunn, svo sem með tilliti til aldurs og reynslu, sem nýtist viðkomandi fyrirtæki og eftir atvikum hagaðilum þess hverju sinni, og sé litið til hlutverks og verkefna fyrirtækisins, rekstrar þess og framtíðarsýnar. Við kosningu í stjórnir einkaréttarlegra fyrirtækja skal miðað við að meirihluti stjórnarmanna sé óháður fyrirtækinu og stjórnendum þess.
Þórdís Lóa Þórhallsdóttir forseti borgarstjórnar segir ákvörðun borgarráðs marka tímamót. „Ný eigandastefna markar nýja tíma þar sem borgin innleiðir góða stjórnarhætti og armslengdarsjónarmið við tilnefningar í stjórnir fyrirtækjanna í þverpólitísku samráði. Það er lögð áhersla á fagleg vinnubrögð, gegnsæi og aukna upplýsingamiðlun.”
Stjórn Faxaflóahafna:
Þórdís Lóa Þórhallsdóttir, formaður
Hildur Björnsdóttir
Már Másson – óháður
Ragnheiður H. Magnúsdóttir – óháð
Varamenn: Friðjón Friðjónsson, Pawel Bartoszek, Íris Baldursdóttir – óháð, Sigurbjörg Ásta Jónsdóttir – óháð
Stjórn Félagsbústaða:
Kjartan Magnússon
Magnús Davíð Norðdahl
Ellý Alda Þorsteinsdóttir – óháð
Haraldur Flosi Tryggvason, formaður – óháður
Ragnheiður Björk Halldórsdóttir – óháð
Varamenn: Helgi Áss Grétarsson, Rannveig Ernudóttir, Kolbrún Garðarsdóttir – óháð, Steinunn Bergmann – óháð, Arent Orri Jónsson
Stjórn Orkuveitu Reykjavíkur:
Skúli Þór Helgason
Ragnhildur Alda Vilhjálmsdóttir
Gylfi Magnússon, formaður – óháður
Vala Valtýsdóttir, varaformaður – óháð
Þórður Gunnarsson – óháður
Varamenn: Björn Gíslason, Sara Björg Sigurðardóttir, Auður Hermannsdóttir – óháð, Páll Gestsson - óháður, Ragnheiður Björk Halldórsdóttir - óháð
Brynhildur Davíðsdóttir fráfarandi formaður stjórnar Orkuveitu Reykjavíkur gaf ekki kost á sér í endurkjör.