Ársreikningur Reykjavíkurborgar fyrir árið 2020 var lagður fyrir borgarráð í dag 29. apríl og vísað til fyrri umræðu í borgarstjórn þann 4. maí næstkomandi.
-
Nær þriggja milljarða neikvæð niðurstaða samstæðu
-
Staða borgarsjóðs engu að síður sterk
-
Eiginfjárhlutfall samstæðu 47,2%
-
Tekjufall bæði í skattekjum og öðrum tekjum miðað við áætlun
-
Viðsnúningur frá 2019 þegar rekstrarniðurstaða var jákvæð um 11 milljarða
Áhrif heimsfaraldurs kórónuveiru birtast ljóslega í ársreikningi borgarsjóðs og A- og B-hluta Reykjavíkurborgar fyrir árið 2020. Hröð kólnun í hagkerfinu á fyrri hluta ársins og lokanir vegna COVID-19 leiddu til þess að vöxtur tekna sem gert var ráð fyrir í fjárhagsáætlun 2020 skilaði sér ekki hvort sem litið er til útsvarstekna eða annarra tekna. Veiking krónunnar hafði einnig umtalsverð áhrif á erlend lán Orkuveitu Reykjavíkur. Þá hefur mikill tekjusamdráttur orðið hjá Faxaflóahöfnum og Strætó auk Sorpu bs. sökum samdráttar í ferðaþjónustu og minni umsvifa innanlands.
Græna planið áætlun út úr samdrættinum
Enn er talsverð óvissa um hversu lengi ástandið mun vara. Af þeim sökum er erfitt að meta áhrif á rekstur og efnahag borgarinnar með áreiðanlegum hætti fram í tímann. Áætlanir stjórnvalda um bólusetningar gefa tilefni til bjartsýni á að unnt verði að ráða niðurlögum faraldursins hér á landi á þessu ári.
„Reykjavíkurborg hefur sett fram öfluga endurreisnaráætlun, Græna planið, til að mæta samdrættinum vegna COVID-19. Það er okkar leið til að snúa vörn í sókn. Borgin stendur sem betur fer vel að vígi til að glíma við efnahagskreppuna en óvissan er engu að síður töluverð. Við sjáum nú vonandi fram á bjartari tíma og að hjólin fari að snúast af fullum krafti,“ segir Dagur B. Eggertsson borgarstjóri.
Lægri útvarstekjur og minni tekjur af sölu byggingarréttar
Rekstrarniðurstaða samstæðu A- og B-hluta Reykjavíkurborgar var neikvæð um tæpa 2,8 milljarða króna en áætlanir gerðu ráð fyrir jákvæðri niðurstöðu upp á tæpa 12 milljarða króna. Rekstrarniðurstaða A-hluta var neikvæð um ríflega 5,8 milljarða króna en áætlun gerði ráð fyrir að hún yrði jákvæð um 1,5 milljarða króna.
Helstu frávik frá áætlun A- og B-hluta má rekja til lægri tekna B-hluta fyrirtækja vegna COVID-19 áhrifa, gjaldfærslu gengismunar hjá Orkuveitu Reykjavíkur vegna veikingar krónunnar auk frávika í A-hluta. Rekstrarniðurstaða fyrir fjármagnsliði var jákvæð um 12,5 milljarða króna sem er 11,3 milljarða króna lakari niðurstaða en áætlanir gerðu ráð fyrir. Þetta er mikill viðsnúningur frá 2019 þegar rekstrarniðurstaða samstæðu var jákvæð um 11 milljarða króna.
Rekstrarniðurstaða A-hluta skýrist einkum af lægri skatttekjum sem nemur 2,7 milljörðum króna en áætlanir gerðu ráð fyrir. Tekjur af sölu byggingarréttar voru einnig 3,2 milljörðum króna undir áætlun. Launakostnaður var einnig hærri sem nemur 1,7 milljörðum króna og annar rekstrarkostnaður 1,2 milljörðum króna yfir áætlun. Rekstrarniðurstaða fyrir fjármagnsliði var neikvæð um tæpa 5,9 milljarða króna en fjárhagsáætlun gerði ráð fyrir jákvæðri niðurstöðu um 2.018 m.kr.
Sterk eiginfjárstaða
Heildareignir samstæðu borgarinnar, A- og B-hluta, samkvæmt samanteknum efnahagsreikningi námu í árslok rúmum 730 milljörðum króna. Heildarskuldir ásamt skuldbindingum voru 386 milljarðar króna og eigið fé var tæpir 345 milljarðar króna. Þar af var hlutdeild meðeigenda 19.176 m.kr. Eiginfjárhlutfall er nú 47,2% en var 49,9% um síðustu áramót.
Rekstur Reykjavíkurborgar skiptist í A-hluta og B-hluta. Til A-hluta telst starfsemi sem að hluta eða öllu leyti er fjármögnuð með skatttekjum. Um er að ræða Aðalsjóð, sem heldur utan um rekstur fagsviða og Eignasjóð.
Til B-hluta teljast hins vegar fjárhagslega sjálfstæð fyrirtæki sem að hálfu eða meirihluta eru í eigu borgarinnar, en rekstur þeirra er að stofni til fjármagnaður með þjónustutekjum. Fyrirtækin eru: Orkuveita Reykjavíkur, Faxaflóahafnir sf., Félagsbústaðir hf., Íþrótta- og sýningahöllin hf., Malbikunarstöðin Höfði hf., Slökkvilið höfuðborgarsvæðisins bs., Sorpa bs. og Strætó bs, auk Aflvaka hf og Þjóðarleikvangs ehf.