Ingunnarskóli og Seljaskóli komust áfram í úrslit hæfileikakeppninnar Skrekks þegar fyrstu undanúrslit fóru fram í gærkvöldi í Borgarleikhúsinu. Áfram verður keppt til úrslita í kvöld og annað kvöld.
Sex grunnskólar í Reykjavík stigu á svið í Borgarleikhúsinu á fyrsta undanúrslitakvöldinu: Austurbæjarskóli, Réttarholtsskóli, Ingunnarskóli, Norðlingaskóli, Seljaskóli og Breiðholtsskóli
Ingunnarskóli komst áfram með atriðið Af hverju má ég ekki bara vera ég? og Seljaskóli með atriðið Sköpun jarðar.
Átján grunnskólar taka þátt í Skrekk í ár en átta þeirra munu keppa til úrslita þann 15. mars. Undanúrslitakvöldin verða sýnd í vefútsendingu á UngRÚV en úrslitakvöldið verður í beinni sjónvarpsútsendingu á RÚV. Um 400 unglingar taka þátt í á frumsömdum atriðum sinna skóla og spreyta sig í leiklist, söng, dansi, hljóðfæraleik, búningahönnun, förðun ljósum, hljóði og annarri sviðsvinnu.
Dómnefnd í undanúrslitum skipa þau Logi Pedro Stefánsson tónlistarmaður, Sigurður Andrean Sigurgeirsson dansari, Rakel Björk Björnsdóttir leikkona, Bryndís Gunnlaugsdóttir frá Ungmennaráði Samfés og Sif Gunnarsdóttir, formaður dómnefndar.