Sex mánaða árshlutauppgjör Reykjavíkurborgar var afgreitt í borgarráði í dag. Afkoma samstæðu borgarinnar var jákvæð á fyrri helmingi ársins og umtalsvert betri en áætlanir gerðu ráð fyrir.
Rekstrarniðurstaða A- og B- hluta var jákvæð um 11.550 milljónir króna en áætlanir gerðu ráð fyrir neikvæðri niðurstöðu um 2.269 milljónir. Rekstrarniðurstaðan er því 13.819 milljónum betri en gert var ráð fyrir í fjárhagsáætlun fyrir árið 2021. Betri niðurstöðu má einkum rekja til matsbreytingu fjárfestingaeigna hjá Félagsbústöðum, áhrifa hækkaðs álverðs og tekjufærslu gengismunar vegna styrkingar krónunnar frá áramótum hjá Orkuveitunni. Afkoma samstæðunnar var 16.054 milljónum króna hærri á fyrstu sex mánuðum þessa árs en á sama tímabili í fyrra.
Heildareignir samstæðunnar námu í lok júní 745.378 milljónum króna en heildarskuldir ásamt skuldbindingum voru 397.078 milljónir. Eigið fé var 348.300 milljónir en þar af var hlutdeild meðeigenda 12.979 milljónir. Eiginfjárhlutfall samstæðunnar er nú 46,7% en var 47,0% um síðustu áramót.
Rekstrarniðurstaða A-hluta, sem er að hluta eða öllu leyti fjármagnaður með skatttekjum, var neikvæð um 7.322 milljónir króna en áætlun gerði ráð fyrir að hún yrði neikvæð um 7.994 milljónir svo niðurstaðan er 672 milljónum betri en gert var ráð fyrir. Frávik frá áætlun skýrist einkum af því að útsvarstekjur voru um 3.115 milljónum króna yfir áætlun en launaútgjöld voru 2.610 milljónum yfir fjárheimildum sem að hluta til má rekja til aðgerða vegna COVID-19.
Mikil áhrif heimsfaraldurs
Útbreiðsla og áhrif COVID-19 faraldursins á heimsvísu eru fordæmalaus og hafa haft mikil fjárhagsleg áhrif á Reykjavíkurborg. Umtalsvert álag hefur verið á stofnanir borgarinnar það sem af er ári, þar sem tekist hefur verið á við samkomutakmarkanir, hólfaskiptingar og önnur úrræði til að fylgja smitgát í samræmi við reglugerðir og fyrirmæli sóttvarnaryfirvalda. Viðbrögð stofnana hafa valdið talsverðum viðbótarútgjöldum í rekstri borgarinnar af þeim sökum. Fjárhagsstaða borgarinnar er þó sterk og hefur hún styrk til að taka á sig veruleg áföll vegna afleiðinga faraldursins.
„Covid-faraldurinn hefur gríðarleg áhrif á fjármál borgarinnar þessi misserin. Við því var að búast og afkoma borgarinnar er heldur betri en áætlanir gerðu ráð fyrir, sem ber sterkri stjórnun í rekstri borgarinnar glöggt vitni,“ segir Dagur B. Eggertsson borgarstjóri. „Borgin leggur höfuðáherslu á að verja starfsemi, velferð og skólastarf við þessar aðstæður og sóknaráætlun borgarinnar, Græna planið er í forgrunni fjármála hjá borginni til framtíðar. Borgin stefnir að kröftugri viðspyrnu, meiri fjárfestingu og góðri þjónustu sem er í mikilli þróun.“
Nánari upplýsingar veitir Halldóra Káradóttir, sviðsstjóri fjármála- og áhættustýringarsviðs: halldora.karadottir@reykjavik.is