Nýtnivikan stendur nú sem hæst en hún hófst á laugardag og stendur yfir til 29. nóvember. Átakið er samevrópskt og tekur Reykjavíkurborg þátt í ár eins og síðustu ár.
Þemað í ár er: Það sem ekki sést. Þar er átt við þann úrgang og sóun sem myndast í framleiðsluferli vöru áður en hún kemst í okkar hendur. Einnig er vísað til þeirrar mengunar sem verður vegna virkni vöru, án þess að við verðum hennar sérstaklega vör. Dæmi um úrgang og sóun sem við gerum okkur svo sannarlega ekki alltaf grein fyrir er orkunotkun og kolefnisspor netnotkunar.
Umhverfisstofnun og Reykjavíkurborg standa fyrir þremur hádegiserindum í tilefni af Nýtnivikunni og fara þau fram með rafrænum hætti á Teams. Þriðja og síðasta erindið fer fram á föstudag og fjallar um umhverfisáhrif gagnavera og netnotkunar. Árni Jón Eggertsson framkvæmdastjóri Reykjavík Data Center segir frá umhverfisáhrifum gagnavera og hvernig við getum dregið úr stafrænu kolefnisspori okkar.
Skoða viðburðinn á Facebook hér.
Fyrsta erindið var frá Jukka Heinonen, prófessor við Háskóla Íslands. Fjallað var um neysludrifið kolefnisspor Íslendinga, sem samkvæmt rannsóknum Jukka er það með því hæsta sem þekkist á heimsvísu. Athugið að erindið er á ensku.
Annað erindið var frá Hrefnu Björgu Gylfadóttur. Hún er loftslagsaðgerðarsinni sem hefur kannað mismunandi leiðir til þess að hafa áhrif á umhverfi sitt, allt frá því að lifa „zero waste“ lífsstíl yfir í að leiða stærri verkefni tengd kerfisbreytingum. Umfjöllunarefnið var hvernig við sem einstaklingar getum haft áhrif á tímum loftlagsbreytinga.
Hér er hægt að horfa á liðin erindi.
Myndatexti: Hvatt var til endurnýtingar á stríðsárunum í Bretlandi.