Samstarf um að efla lestur barna og ungmenna

Markmið þessa samstarfs er að efla læsi barna og ungmenna og vekja áhuga þeirra á íslenskum barnabókmenntum. Aukið verður við bókakost skólabókasafna og leikskóla á innlendum barnabókmenntum og verður veitt 7 mkr. viðbótarfjármagni til bókainnkaupa á þessu ári í samræmi við yfirlýsta áhersluþætti um að efla læsi, málþroska, lestrarfærni og lesskilning.  

Jafnframt munu útgefendur íslenskra barnabóka halda bókamessu í október þar sem stjórnendum skólasafna og leikskóla í Reykjavík gefst kostur á að kynna sér nýjar bækur, ræða við höfunda og kaupa nýútkomnar barna- og unglingabækur á góðum kjörum. 

Rannsóknir hafa sýnt að upplestur fyrir börn og þeirra eigin lestur eflir orðaforða, umskráningu og lesskilning þeirra. Því er góður bókakostur leik- og grunnskóla fyrir alla aldurshópa mikilvægur. Fram kemur í læsisstefnu leikskóla Reykjavíkurborgar, Lesið í leik, að barnabókmenntir eru mikilvægasti liðurinn í almennri málörvun barna á leikskólaaldri. Þá jafna bókmenntir tækifæri barna til náms og eru einn af grundvallarþáttum barnamenningar. 

Ein af tillögum Fagráðs um eflingu málþroska, lestrarfærni og lesskilnings í leik- og grunnskólum sem skilaði niðurstöðum árið 2015 sneri að markvissri lestrarkennslu og lestrarþjálfun alla grunnskólagönguna. Því er mikilvægt að nemendur hafi aðgang að lesefni sem samrýmist hæfni þeirra og áhugasviði.