Between Mountains bar sigur úr býtum í Músíktilraunum 2017. 12 hljómsveitir kepptu á úrslitakvöldinu sem haldið var í Norðurljósum í Hörpu og voru veitt verðlaun fyrir 1., 2. og 3. sætið, en auk þess voru veitt verðlaun í fleiri flokkum.
Hljómsveitin Between Mountains kemur frá Suðureyri við Súgandafjörð og Núpi í Dýrafirði og samanstendur af þeim Kötlu Vigdísi Vernharðsdóttur og Ásrósu Helgu Guðmundsdóttur. Hljómsveitin stofnuðu þær í byrjun mars til að taka þátt í Söngkeppni Samfés og í framhaldi Músíktilraunum. Katla semur lögin og textana fyrir hljómsveitina, hún spilar á hljómborð og syngur, Ásrós syngur í hljómsveitinni og spilar inn á milli á xylófón.
Samkeppnin var hörð enda óvenju sterkar og fjölbreyttar hljómsveitir þetta árið og hvorki meira en minna en tólf atriði sem komust áfram í úrslit.
Niðurstaða kvöldsins var á endanum þessi:
1. sæti Between Mountains
2. sæti Phlegm
3. sæti Omotrack
Verðlaun voru einnig veitt í fleiri flokkum:
• Hljómsveit fólksins sem er valin með símakosningu er Misty.
• Söngvari Músíktilrauna eru þær stöllur Katla Vigdís Vernharðsdóttir og Ásrós Helga Guðmundsdóttir úr Between Mountains
• Gítarleikari Músíktilrauna er Helgi Freyr Tómasson úr Hewkii
• Bassaleikari Músíktilrauna er Flemming Viðar Valmundsson úr Phlegm
• Píanó/hljómborðsleikari Músíktilrauna er Dagur Bjarki Sigurðsson öðru nafni Adeptus
• Trommuleikari Músíktilrauna er Ögmundur Kárason úr Phlegm
• Rafheili Músíktilrauna er Helgi Freyr Tómasson úr Hewkii
• og piltarnir sem kalla sig Hillingar fengu viðurkenningu fyrir textagerð á íslensku.
TIL HAMINGJU!