Hverfissjóður Reykjavíkur hefur auglýst umsóknarfrest vegna styrkja ársins og er hann til miðnættis föstudaginn 15. apríl.
Einstaklingar, hópar, félagasamtök, fyrirtæki og stofnanir geta sótt um styrki til verkefna í einu eða fleiri hverfum eða almennt í borginni og getur styrkupphæð numið allt að 700.000 krónur.
Tilgangur Hverfissjóðs Reykjavíkur er að styðja við verkefni sem stuðla að eftirtöldum þáttum í hverfum borgarinnar:
- bættu mannlífi og eflingu félagsauðs,
- fegurri ásýnd borgarhverfa,
- auknu öryggi í hverfum borgarinnar,
- samstarfi íbúa, félagasamtaka eða fyrirtækja við borgarstofnanir.
Nánari upplýsingar er að finna á reykjavik.is/hverfissjodur og þar er að finna reglur sjóðsins og tengingar vegna umsókna en sótt er um á Mínum síðum á Rafrænni Reykjavík.
Hverfissjóður Reykjavíkurborgar byggir á samfélagssjóði SPRON sem var færður borginni til varðveislu og úthlutunar. Í stjórn Hverfissjóðs Reykjavíkur sitja samkvæmt skipun borgarstjóra: Ólöf Örvarsdóttir, Óskar Dýrmundur Ólafsson og Jón Halldór Jónasson. Verkefnisstjóri stjórnar sjóðsins er Lilja Sigurbjörg Harðardóttir.