Vel gengur að innleiða stefnu um fjölmenningarlegt skóla- og frístundastarf

Margt hefur áunnist á þeim tíma sem liðinn er síðan stefnan tók gildi en teymi sérfræðinga á vegum skóla- og frístundasviðs hefur haldið utan um innleiðingu hennar. Teymið er skipað þeim Dagbjörtu Ásbjörnsdóttur, Dröfn Rafnsdóttur og Fríðu Bjarneyju Jónsdóttur sem leiðir starfið. 

• Reglum um fjármagn til grunnskóla vegna íslenskukennslu var breytt sumarið 2015 í kjölfar innleiðingar á matstækinu Milli mála sem Dr. Elín Þöll Þórðardóttir vann að í samstarfi við skóla- og frístundasvið. Samkvæmt nýjum reglum fá skólar úthlutað fjármagni vegna nemenda sem þurfa stuðning í íslensku sem öðru máli svo lengi sem þeir þurfa á honum að halda en ekki samkvæmt reglum um dvalartíma og skyldleika tungumáls fyrstu tvö árin eins og áður var. Þetta er afar mikilvæg niðurstaða enda hafa rannsóknir hér á landi og erlendis sýnt að það þrátt fyrir að það taki börn ekki nema um 1-2 ár að ná tökum á nýju tungumáli sem nýtist þeim í félagslegum samskiptum en það tekur börn 5-7 ár að ná tökum á skólaorðaforða.
• Ráðinn hefur verið verkefnastjóri fjölmenningar fyrir grunnskóla og jafnframt veitir Miðja máls og læsis ráðgjöf og fræðslu um mál og læsi tví- og fjöltyngdra barna.
• Boðið hefur verið upp á fjölbreytta fræðslu fyrir kennara og starfsfólk í skóla- og frístundastarfi, m.a. í samstarfi við Menntavísindasvið HÍ.
• Við úthlutun úr þróunarsjóði skóla- og frístundaráðs 2015 og 2016 var sérstaklega horft til verkefna á sviði fjölmenningar og barna með annað móðurmál en íslensku.
• Tengiliðir fjölmenningar í leikskólum borgarinnar hafa frá árinu 2011 fundað 3-5 sinnum yfir skólaárið þar sem miðlað er þekkingu, fræðslu og færni á jafningjavettvangi. Sambærileg teymi hafa verið stofnuð í grunnskólum borgarinnar.
• Fjármagn til túlkaþjónustu fyrir foreldra hefur verið aukið.
• Upplýsingagjöf til foreldra hefur verið bætt m.a. með útgáfu upplýsinga um grunnskóla á fimm tungumálum, bæklingum um frístundastarf og bættri upplýsingagjöf til foreldra á heimasíðum leikskóla og grunnskóla.
• Gerður hefur verið samstarfssamningur við samtökin Móðurmál um að kennarar og börn á þeirra vegum fái aðgang að húsnæði borgarinnar til kennslu án endurgjalds. 
• Áherslur Barnamenningarhátíðar árið 2016 voru fjölmenningarlegar. Fjölmargir viðburðir höfðu það því að markmiði að fagna fjölbreyttum tungumálum og menningu barna og ungmenna.