Eitt hundrað unglingar úr félagsmiðstöðinni Frosta eru nýkomnir heim úr velheppnaðri skíðaferð til Akureyrar.
Einn af hápunktum vetrardagskrár frístundamiðstöðvarinnar Frostaskjóls er hin árlega skíðaferð unglinganna í félagsmiðstöðinni Frosta. Að þessu sinni var stefnan tekin á Akureyri helgina 29. – 31.janúar. Gríðarlegur áhugi var fyrir ferðinni í ár og fór skráning fram úr björtustu vonum. Alls fóru 110 manns með í ferðina, 101 unglingur og 9 starfmenn, og var þetta fjölmennasta ferðin til þessa.
Strax í upphafi hófst skemmtilegur leikur sem fólst í því að unglingunum var skipt í smærri hópa þar sem þau unnu saman sem lið og leystu í sameiningu alls kyns þrautir. Hver hópur fékk afhent eitt egg sem þau áttu að passa upp á í ferðinni. Þau gáfu egginu nafn, stofnuðu instagram-síðu fyrir eggið og söfnuðu stigum með þrautum tengdum egginu sínu. Gist var í Glerárskóla þar sem hver hópur fékk sína heimastofu. Unglingarnir skemmtu sér á skíðum og snjóbretti í Hlíðarfjalli, skelltu sér út að borða og áttu svo góða stund saman á kvöldvöku á laugardagskvöldinu. Eftir annan góðan dag í fjallinu á sunnudeginum lögðu sáttir og sælir unglingar af stað heim á leið eftir skemmtilega og viðburðaríka helgi.
Hópurinn var til fyrirmyndar hvert sem farið var og er starfsfólk Frosta stolt af þeim og er strax byrjað að hlakka til næstu ferðar.