Jón Gunnar Tómasson, fyrrverandi borgarritari og ríkislögmaður, lést 23. apríl sl. á hjartadeild Landspítalans. Hann var fæddur 7. desember 1931, sonur hjónanna Tómasar Jónssonar borgarritara og Sigríðar Thoroddsen húsfreyju. Jón Gunnar Tómasson starfaði í 28 ár hjá Reykjavíkurborg.
Dagur B. Eggertsson borgarstjóri minntist Jóns Gunnars Tómassonar fyrrverandi borgarritara í upphafi borgarstjórnarfundar í dag.
Jón gegndi ýmsum embættum á 28 ára ferli sínum hjá Reykjavíkurborg.
Árið 1966 tók Jón við starfi skrifstofustjóra borgarstjórnar Reykjavíkur, sem hann gegndi til 1979 þegar hann tók við embætti borgarlögmanns. Frá 1982 gegndi Jón störfum borgarritara uns hann var skipaður í embætti ríkislögmanns 1994, sem hann sinnti þar til hann lét af störfum fyrir aldurs sakir.
Útför Jóns fór fram frá Neskirkju í dag.
Reykjavíkurborg sendir fjölskyldu og aðstandendum Jóns hugheilar samúðarkveðjur.