Bókmenntaverðlaun Tómasar Guðmundssonar - frestur rennur út 1. júní
Mannlíf Menning og listir
Bókmenntaverðlaun Tómasar Guðmundssonar eru veitt ár hvert í minningu Tómasar Guðmundssonar fyrir óprentað handrit að ljóðabók. Frestur til að skila inn handritum rennur út 1. júní næstkomandi. Dómnefnd verðlaunanna er skipuð þremur einstaklingum.
Hvernig tekur fólk þátt?
Auglýst hefur verið eftir óprentuðu handriti að ljóðabók, frumsömdu á íslensku. Skilafrestur rennur út 1. júní 2016.
Útgáfuréttur verðlaunahandrits er í höndum höfundar eða þess forlags sem hann ákveður. Sé dómnefnd á einu máli um að ekkert þeirra verka sem borist hafa fullnægi þeim kröfum sem hún telur að gera verði til verðlaunaverka, má fella verðlaunaafhendingu niður það ár. Handritum sem keppa til verðlaunanna þarf að skila merktum dulnefni, en nafn og heimilisfang fylgi með í lokuðu umslagi.
Handrit berist í síðasta lagi 1. júní 2016.
Utanáskrift:
Bókmenntaverðlaun Tómasar Guðmundssonar
b.t. Signýjar Pálsdóttur, skrifstofustjóra menningarmála,
Menningar- og ferðamálasviði Reykjavíkurborgar,
Vesturgötu 1, 2. hæð,
101 Reykjavík.
Hver skipar dómnefnd?
Dómnefnd verðlaunanna er skipuð af borgarráði og er hún skipuð þremur einstaklingum. Þar af einum samkvæmt tilnefningu menningar- og ferðamálaráðs og einum sem tilnefndur er af Rithöfundasambandi Íslands. Dómnefnd skal skipuð í maí fyrir verðlaun komandi árs og ljúka störfum fyrir 15. ágúst árið eftir.
Dómnefnd árið 2016 skipa Úlfhildur Dagsdóttir formaður og Ragnhildur Pála Ófeigsdóttir, tilnefnd af menningar- og ferðamálaráði, og Bjarni Bjarnason, tilnefndur af Rithöfundasambandi Íslands.
Hver eru verðlaunin?
Verðlaunahafi hlýtur verðlaunafé. Verðlaunaféð er greitt af Reykjavíkurborg og eru ein verðlaun veitt árlega í vetrarbyrjun. Árið 2016 verður upphæð verðlaunanna 700 þúsund krónur.
Verðlaunahafar frá upphafi
2015: Ragnar Helgi Ólafsson - Til hughreystingar þeim sem finna sig ekki í samtíma sínum
2014: Hjörtur Marteinsson - Alzheimer-tilbrigðin
2013: Bjarki Karlsson – Árleysi alda
2012: Dagur Hjartarson – Þar sem vindarnir hvílast - og fleiri einlæg ljóð
2011: Sindri Freysson – Í klóm dalalæðunnar
2010: Þórdís Gísladóttir – Leyndarmál annarra
2009: Eyþór Árnason – Hundgá úr annarri sveit
2008: Magnús Sigurðsson – Fiðrildi, mynta og spörfuglar Lesbíu
2007: Ari Jóhannesson – Öskudagar
2006: Ingunn Snædal – Guðlausir menn - Hugleiðingar um jökulvatn og ást
2004: Auður Ólafsdóttir – Rigning í nóvember
2002: Sigurbjörg Þrastardóttir – Sólar Saga
2000: Hjörtur Björgvin Marteinsson – AM 00
1998: Bjarni Bjarnason – Borgin bak við orðin
1997: Elín Ebba Gunnarsdóttir – Sumar sögur
1994: Helgi Ingólfsson – Letrað í vindinn.