Í dag var lagt fram í borgarstjórn frumvarp að fjárhagsáætlun fyrir árið 2016 og fimm ára áætlun til 2020.
Áætlunin gerir ráð fyrir að rekstrinum verði snúið við á næsta ári og muni A-hluti borgarinnar sem heldur utan um grunnreksturinn skila 567 milljón króna afgangi. Þá muni samstæðan, A- og B-hluti verða rekin með tæplega 8,1 milljarða króna afgangi.
Markmið áætlunarinnar er að grunnrekstur borgarinnar verði sjálfbær. Með því skapast svigrúm til fjárfestingar og dregið verður úr þörf fyrir skuldsetningu.
Gert er ráð fyrir að heildarskuldir samstæðunnar lækki um 12.828 mkr. á næstu fimm árum. Þá er gert ráð fyrir að Orkuveita Reykjavíkur sem hefur staðist allar áætlanir um viðsnúning í rekstri fari að skila hóflegum arði til eigenda sinna árið 2018.
Skuldaviðmið Reykjavíkurborgar samkvæmt sveitarstjórnarlögum er talsvert undir viðmiðunum laganna en niðurstaða reksturs A-hluta og samstæðunnar er jafnframt innan markmiða laganna um rekstur á þriggja ára tímabili.
Áætlunin tekur mið af því að árinu 2015 tók afkoman að versna talsvert í kjölfar mikilla launahækkana og breytinga á gjaldfærslu lífeyrisskuldbindinga sem verða gríðarháar á þessu ári.
Halli á fjárhagssamskiptum við ríkið
Ein ástæðan fyrir vaxandi rekstrarhalla borgarinnar og annarra sveitarfélaga má rekja til fjárhagssamskipta þeirra við ríkið. Sveitarfélögin telja og hafa ályktað þar að lútandi að verulega vanti upp á fjármuni frá ríkinu til að tryggja þjónustu við fatlað fólk og þjónustu við eldri borgara á hjúkrunarheimilum. Þá hefur ríkið rukkað sveitarfélögin um tryggingargjald umfram það sem atvinnustig í landinu kallar á.
Hallinn á málaflokki fatlaðs fólks nemur um 1.100 milljónum á þessu ári, hallinn á hjúkrunarheimilunum nemur 288 milljónum og tryggingagjaldið umfram það sem eðlilegt getur talist tæpum 800 milljónum. Alls gerir þetta um 2,1 milljarð króna.
„Meginatriðið í áætluninni er að ná tökum á þeirri stöðu sem sveitarfélögin standa frammi fyrir. Hækkandi launaliðir, lífeyrisskuldbindingar og fjárhagsleg samskipti við ríkið hafa kallað á sterk viðbrögð sveitarfélaganna allra á undanförnum misserum. Um leið erum við setja fram áætlun um hvernig bregðast skuli við hækkandi útgjöldum og minni tekjum en áætlað var. Þó munu skattar haldast óbreyttir og þegar allt er talið verður áfram hagstæðast fyrir fjölskyldur að búa og nýta þjónustu í Reykjavík“ segir Dagur B. Eggertsson borgarstjóri sem mælti fyrir frumvarpinu.
Fjárfest fyrir tæpa tíu milljarða
Miklar fjárfestingar eru framundan í borginni á næstu fimm árum. Fjárfest verður fyrir 9,9 milljarða króna á næsta ári. Langstærstu verkefnin eru skólabyggingar, íþróttamannvirki og menningarmiðstöð í Úlfarsárdal, viðbyggingar við Klettaskóla og Vesturbæjarskóla, útisundlaug við Sundhöll Reykjavíkur og stækkun Borgarbókasafns-menningarhúss við Tryggvagötu.
Þá verður fjárfest í gatnagerð í nýjum hverfum við Hlíðarenda og Vogabyggð. Einnig stendur til að endurnýja götulýsingu á næstu árum og innleiða þar nýja tækni auk þess sem viðhald á gatnakerfi borgarinnar krefst talsverðra fjármuna.