Það er endurnærandi að stunda jóga í hressandi sjávarloftinu í Viðey með fagra fjallasýn allt um kring. Þriðjudagskvöldið 21. júlí fáum við til okkar Arnbjörgu Kristínu Konráðsdóttur til þess að leiða göngu um eyjuna þar sem verður stoppað á völdum stöðum og gerðar styrkjandi jógaæfingar undir beru lofti. Við endum gönguna með slökun hjá Friðarsúlunni undir hinum mögnuðu tónum gongsins.
Gongslökun nýtur sívaxandi vinsælda en heilandi tónar þessa hljóðfæris hjálpa okkur kyrra hugann og ná djúpslökun.
Siglt verður frá Skarfabakka kl. 18.15 og 19.15 en gangan hefst kl. 19.30. Það er upplagt fyrir þá sem vilja fá sér léttan kvöldverð í Viðeyjarstofu fyrir göngu að taka fyrri ferjuna. Göngunni lýkur við Viðeyjarstofu og munu gestir hafa tíma til þess að kaupa sér veitingar áður en báturinn siglir heim kl. 22.00.
Þátttakendur eru beðnir um að koma klæddir eftir veðri og í góðum skóm. Gott er að hafa með sér vatnsbrúsa en ekki þarf að taka með sér jógadýnur. Þátttakendur á öllum aldri eru velkomnir og ekki er nauðsynlegt að hafa stundað jóga áður.
Arnbjörg Kristín Konráðsdóttir er reyndur kundalini jógakennari og kennir bæði börnum og fullorðnum. Hún býður upp á gongheilun, jóga fyrir barnshafandi konur, jóga í sundi og er bowen tæknir. Hún gaf út bókina Hin sanna náttúra árið 2013. Bókin vísar veginn að fallegum stöðum í náttúrunni til þess að stunda jóga og hugleiðslu og þar má meðal annarra staða finna Viðey.