Í félagsmiðstöðvum fyrir fullorðna sem eru staðsettar víðs vegar um borgina koma þátttakendur sjálfir að því að móta fjölbreytta dagskrá sem stuðlar að virkni og aukinni samfélagsþátttöku borgaranna. Í stefnu Reykjavíkurborgar í málefnum eldri borgara til ársins 2017 er lögð áhersla á forvarnir sem auka eiga lífsgæði og heilbrigði fólks.
Mikilvægur liður í því er aukin hreyfing og alls konar frístundaiðkun sem bæði er fyrir huga og hönd. Leikfimi, jóga, dans, boccía, pútt og göngur eru í boði á flestum stöðum auk ýmis konar námskeiða í handverki.
Nú á haustdögum setja félagsmiðstöðvarnar fram haustdagskrá og er fólk hvatt til að kynna sér það sem í boði er og skrá sig í hópa og á hin ýmsu námskeið. Starfsfólk leggur sig fram um að virkja frumkvæði , fá fram vilja þeirra sem sækja félagsstarfið og aukin áhersla er á virka þátttöku notenda. Mikil gróska hefur verið í hópastarfi og sjálfboðastarfi í félagsmiðstöðvunum. Áhugasamir geta gefið sig fram við umsjónarmenn félagsstarfs á hverjum stað. ( sjá upplýsingabæklinginn- Vertu með)
Með þátttöku í félags – og frístundastarfi vinnur hver og einn að valdeflingu og eigin heilbrigði. Að tilheyra hópi, hitta fólk og efla félagslega færni hjálpar fólki að búa lengur heima og er í sjálfu sér heilsuvernd. Í Laugardal – Háaleitis og Bústaðahverfi eru 7 félagsmiðstöðvar fyrir fullorðna og hægt að sjá nánar um þær á vef Reykjavíkurborgar