Tvær sýningar verða opnaðar í Listasafni Reykjavíkur-Kjarvalsstöðum laugardaginn 8. febrúar kl. 16. Sýning á verkum finnska listamannsins Harros og sýning Hildar Ásgeirsdóttur Jónsson sem ber heitið Úr iðrum jarðar. Listamennirnir verða viðstaddir opnunina.
Harro er mikilvægur í sögu norrænnar myndlistar en hefur fengið minni athygli hér á landi en hann verðskuldar. Verk hans eru nú í fyrsta skipti kynnt fyrir íslenskum áhorfendum í samstarfi við Listasafnið í Turku í Finnlandi sem á móti kynnir verk Errós fyrir Finnum. Harro og Erró hafa báðir lagt fram mikilvægan skerf til sögu samtímalistarinnar. Verk þeirra vekja enn umræður og áhuga fræðimanna og veita listamönnum og öðrum í menningarlífinu innblástur.
Á sýningunni verður sjónum beint að popplistaverkum Harros frá 1968 til 1972 en þau ollu uppnámi þegar þau voru fyrst sýnd í Finnlandi. Þar eru m.a. verk byggð á finnska fánanum, á vörumerkjum alþjóðlegra fyrirtækja og hin þekkta svína-syrpa. Verkin úr þessum myndaseríum veita góða innsýn í hugarheim Harros. Þau eru fengin að láni frá Listasafninu í Turku, Wainö Aaltonen-listasafninu, Kiasma-nútímalistasafninu í Helsinki og frá listamanninum.
Það á sérstaklega vel við að sýna eldri verk Harros á hér á landi nú þegar Íslendingar eru smátt og smátt að ná áttum eftir efnahagshrunið 2008 og takast á við gagnrýnið endurmat á samfélagsgildum sínum og lífsháttum. Verkin í svína-syrpunni og Lífsmáta Finna tala til okkar þótt landamæri og áratugir skilji að. Sjálfsánægjuna og sinnuleysið sem Harro dregur fram í svína-syrpunni þekkja allir, ungir sem aldnir og þær spurningar sem Harro varpar fram í fána-myndröðinni – götóttir fánar, fánar sem togna, bólgna, skreppa saman, rifna, sundrast, molna, bráðna eða brenna – eiga jafn vel við um íslenskan lífsmáta og finnskan.
Hildur Ásgeirsdóttir Jónsson hefur í rúm 15 ár sameinað málaralist og vefnað með því að búa til málverk ofin úr handlituðum silkiþráðum. Hún sækir efnivið sinn í íslenskt landslag og hefur t.d. búið til myndraðir um Vatnajökul og Heklu. Á sýningunni Úr iðrum jarðar má sjá úrval af þessum stóru málverkum sem ofin eru í þriggja metra breiðum vefstól. Þá verða sýnd fjölmörg nýrri verk. Hildur kemur tvisvar á ári til Íslands og tekur ljósmyndir á gönguferðum sínum um landið. Hlutar úr þessum ljósmyndum – skuggar af fjallstindum eða jökulsprungur – eru einangraðir, klipptir út og stækkaðir. Hildur vefur síðan þessar myndir á vinnustofu sinni í Cleveland. Það er flókið ferli þar sem hún handlitar þræðina áður en hún fellir þá inn í vefinn. Í þessu ferli umbreytast frummyndirnar svo verkin virðast abstrakt eða minna á frumform á borð við lifandi frumur, grjót eða stjörnuþokur.
Sýning Hildar er í tveimur hlutum. Hinn hluti hennar var sýndur í Tang-safninu í New York frá 17. ágúst til 29. desember 2013.
Hildur hefur hlotið fjölda viðurkenninga og verðlauna, þar á meðal hin virtu og eftirsóttu listaverðlaun Cleveland-borgar í Ohio-ríki í Bandaríkjunum og styrki frá Ohio Arts Council, auk þess sem hún vann opinber verk fyrir Cleveland Clinic-stofnunina. Árið 2004 hlotnaðist Hildi sérstakur listamannsstyrkur frá Ohio Arts Council og sama ár var hún fengin til þess að vinna listaverk sem afhent voru verðlaunahöfum í listasamkeppni ríkisstjórans í Ohio það árið.
Hildur hefur sýnt víða, meðal annars í Samtímalistasafninu í Cleveland, William Busta-galleríinu í Cleveland og fjölmörgum galleríum og söfnum á Íslandi. Mörg söfn eiga verk eftir hana, m.a. Listasafnið í Cleveland, Listasafn Reykjavíkur, The Progressive Insurance Collection og Cleveland Clinic-stofnunin.
Hildur Ásgeirsdóttir Jónsson fæddist í Reykjavík en hefur búið í Cleveland í þrjátíu ár. Hún lagði stund á nám í arkitektúr frá 1983 til 1985 við Kent State-háskólann áður en hún sneri sér að myndlistarnámi við Cleveland Institute of Art. Eftir það lauk hún BFA-gráðu árið 1991 og MFA-gráðu 1995 við Kent State-háskólann.