Freyja, Vinný Dögg og Krista sigruðu ljósmyndasamkeppni grunnskólanna

Ungir ljósmyndarar fengu það verkefni að finna hvernig hið manngerða og hin villta náttúra mætast í borgarlandslaginu því náttúran finnur sér oft samastað á sérkennilegum stöðum.

Nær 150 myndir bárust í keppnina en skilafrestur rann út 21. september. Ljósmyndirnar eru hvaðanæva úr borginni eins og ljósmyndararnir sem eru úr mörgum grunnskólum og á ýmsum aldri. Ljósmyndirnar sem bárust eru einstaklega fjölbreytilegar og skemmtilegar og sýna vel hugmyndaflug, frumlega nálgun og færni.

Fyrstu verðlaun:

Freyja Stígsdóttir úr 7. AS í Austurbæjarskóla

Í umsögn dómnefndar segir m.a.: „Freyja sendir inn tvær myndir sem báðar eiga það sameiginlegt að sýna óvænt líf og litríki í borgarlandslaginu. Annars vegar mynd af myndarlegri plöntu sem vex upp úr gangstéttinni og hins vegar gróður í óvenjulegu keri við veginn. Báðar myndirnar eru teknar af listfengi þar sem hugað er að sjónarhorni og litum.“



Önnur verðlaun:

Vinný Dögg Jónsdóttir 8. bekk Árbæjarskóla

„Vinný sendi inn frábæra 24 mynda seríu með fjölbreyttu myndefni og skemmtilegum sjónarhornum. Myndefnið er skondið og óvænt og þrælpassar í þema keppninnar um náttúruna á óvæntum stöðum“.



Þriðju verðlaun:

Krista Takefusa Kristófersdóttir úr 7. KM í Austurbæjarskóla

„Ljósmyndari hefur fundið skemmtilegt myndefni í bakgarði yfirgefins húss í borginni þar sem mætist hið manngerða og órækt náttúrunnar. Villtur og skapandi kraftur graffítis á veggjnum er í skemmtilegu samspili við villtan og óhirtan garð náttúrunnar. Sjónarhornið er óvænt og birtir okkur líf og litagleði.“



Fjórðu til fimmtu verðlaun hljóta:

Árni Jónsson, 3. bekk Selásskóla

„Árni sendi inn skemmtilega seríu af myndum sem sýna að hann hefur næmt auga fyrir hinu smáa og óvænta í umhverfinu. Mynd af sporinu í sandi og brotinni skel er sérstaklega skemmtileg og táknræn, maðurinn verður að fara með gát í náttúrunni sem er alls staðar í borgarlandinu“.



Freyja Hólm, Iker og Elín í 4. L Laugarnesskóla

„Einstaklega falleg og stílhrein ljósmynd af rósettum í Grasagarðinum. Þétt breiða af geislóttum rósettunum þar sem ein stór er umlukin mörgum minni kallar fram hugmyndir um hlýju og vernd og minnir okkur á að plöntur þurfa að þrauka harðan vetur áður en þær blómgast á ný“.



Verðlaunin voru afhent í Ráðhúsi Reykjavíkur föstudaginn 3. október og fengu þeir sem sigruðu í keppninni fallegar ljósmyndabækur í verðlaun. 

Allar myndir keppninnar eru á Facebooksíðu Reykjavíkurborgar.

Í dómnefnd sátu:

Björn Ingvarsson – áhugaljósmyndari og deildarstjóri þjónustumiðstöðvar í Stórhöfða,

Edda Ýr Garðarsdóttir – myndlistarkennari Dalskóla,

Sigrún Björnsdóttir – upplýsingafulltrúi skóla- og frístundasviðs Reykjavíkur,

Snorri Sigurðsson – umsjónarmaður Reykjavík-iðandi af lífi.