Aðalskipulag Reykjavíkur 2010-2030 var undirritað í Höfða í gær. „Þetta er glæsilegt og gott aðalskipulag sem mun hjálpa okkur að gera góða borg enn betri,“ segir Jón Gnarr borgarstjóri um skipulagið.
Aðalskipulag Reykjavíkur 2010-2030 var samþykkt í borgarstjórn hinn 26. nóvember 2013 og sent Skipulagsstofnun til staðfestingar í byrjun desember. Í bréfi Skipulagsstofnunar frá 28. janúar 2014 voru gerðar athugasemdir við nokkur atriði í aðalskipulaginu. Athugasemdirnar vörðuðu einkum orðalag fyrirvara vegna landnotkunar í Vatnsmýri og um mislæg gatnamót og samræmi þeirrar stefnu við svæðisskipulag höfuðborgarsvæðisins. Vegna þessara athugasemda voru samþykktar í borgarráði hinn 6. febrúar, breytingar á ofangreindum fyrirvörum, auk lagfæringa á einstaka öðrum atriðum í aðalskipulaginu. Skipulagsstofnun afgreiddi aðalskipulagið til staðfestingar með bréfi þann 11. febrúar 2014.
Jón Gnarr borgarstjóri og Páll Hjalti Hjaltason, formaður umhverfis- og skipulagsráðs undirrituðu aðalskipulagið fyrir hönd Reykjavíkurborgar og Ásdís Hlökk Theódórsdóttir, forstjóri og Hafdís Hafliðadóttir sviðsstjóri fyrir hönd Skipulagsstofnunar. Aðalskipulagið tekur gildi með birtingu staðfestingar í Stjórnartíðindum.
Endurskoðun á aðalskipulaginu 2001-2024 hefur staðið yfir undanfarin ár og falist í margvíslegri greiningarvinnu, mati valkosta og samráði við íbúa og hagsmunaaðila. Með staðfestingu aðalskipulagsins tekur það gildi og verður unnið eftir áherslum þess við frekari skipulagningu og uppbyggingu borgarinnar.
Borg fyrir fólk
Borg fyrir fólk er leiðarvísirinn í nýju aðalskipulagi og tekur stefnumótunin mið af því. Í aðalskipulaginu er lögð sérstök áhersla á hverfin og einstaka borgarhluta. Markmiðið er að hverfi borgarinnar verði sjálfbærari, mannvænni og fjölbreyttari þar sem allir félagshópar fá tækifæri til búsetu. Hvert hverfi hafi sinn kjarna svo dagleg verslun og þjónusta verði í sem mestri nálægð við íbúa.
Aðalskipulagið gerir ráð fyrir að 90% allra nýrra íbúða á tímabilinu rísi innan núverandi marka borgarinnar. Markmiðið er að skapa heildstæðari og þéttari borgarbyggð og nýta þar með betur land og fjárfestingar í gatna- og veitukerfum og þjónustustofnunum. Með þéttari byggð dregur almennt úr vegalengdum, samgöngukostnaði og umhverfisáhrifum samgangna. Verkefni næstu áratuga er að fullbyggja Borgina við Sundin og því er uppbyggingu nýrra hverfa í útjaðri slegið á frest.
Græna borgin er eitt af þemum nýs aðalskipulags og er gert ráð fyrir að 40% lands verði opin svæði innan þéttbýlis Reykjavíkur ætluð til útivistar, afþreyingar og leikja. Reykjavíkurborg hefur mikinn metnað til að verða grænni og vistvænni og þar gegna samgöngur mikilvægu hlutverki. Stefnt er að því að hlutdeild almenningssamgangna í ferðum til og frá vinnu vaxi úr 4% í 12% og hlutdeild gangandi og hjólandi vaxi úr 21% í 30%.
Skapandi borg
Reykjavík er Skapandi borg með öflugt og fjölbreytt atvinnulíf. Markmið aðalskipulagsins er að viðhalda fjölbreytni og styrk atvinnulífsins og skapa vaxtarskilyrði fyrir nýjar atvinnugreinar, einkum á sviði hátækni, grænnar orkunýtingar og menningar. Lögð er áhersla á að Reykjavík styrki hlutverk sitt sem höfuðborg landsins og verði forystuafl í vaxandi alþjóðlegri samkeppni um fyrirtæki, vinnuafl og ferðamenn.
Mikilvægt er fyrir borgarbúa að þekkja þær megináherslur sem birtast í aðalskipulaginu því þar má finna framtíðarsýn sem kemur öllum Reykvíkingum við.