Umhverfis- og skipulagsráð samþykkti deiliskipulag fyrir Vesturbugt og Nýlendureit á fundi sínum í dag, 20. nóvember. Að auki samþykkti ráðið breytingu á aðalskipulagi Reykjavíkur 2001-2024 sem snýst um að fallið verði frá því að leggja Mýrargötu í stokk. Tillögunum var vísað til borgarráðs.
Nýtt deiliskipulag fyrir Vesturbugt leggur áherslu á vistvæna byggð. Nýja byggðin mun einkennast af vönduðum almenningsrýmum og atvinnuhúsnæði á jarðhæð sem mun skapa grundvöll fyrir iðandi mannlíf. Byggðin mun styðja við þá gróskumiklu starfsemi sem hefur þegar fest rætur umhverfis reitinn. Öll svæði utanhúss verða vandlega hönnuð almenningsrými. Reiturinn verður því mun meira aðlaðandi fyrir mannlíf og útivist en hann er í dag.
Byggðin verður þétt sem er liður í þeirri stefnu að auka byggðina í nálægð við vinnustaði, verslun og þjónustu miðborgarinnar. 0,8 bílastæði verða á íbúð sem þýðir að hægt verður að selja minni íbúðir án bílastæða sem lækkar kostnað töluvert og ýtir undir fjölbreytta íbúasamsetningu. 20% íbúða skulu vera leiguíbúðir.
Samkvæmt gildandi deiliskipulagi átti að fjarlægja slippinn og rífa hluta verbúða við Suðurbugt. Horfið er frá því samkvæmt þessu deiliskipulagi og mun slippurinn fá að standa eins og hann er.
Fjölbreytt byggð með atvinnustarfsemi
Skipulagið gerir ráð fyrir 195 íbúðum og tæplega 8.000 fermetra af atvinnuhúsnæði sem verða í nánum tengslum við gömlu höfnina sem verður áfram starfrækt sem stærsta fiskihöfn landsins. Skipulagið gerir ráð fyrir nánu sambandi byggðar og iðandi hafnarlífs sem gerir svæðið einstakt.
Rík áhersla er lögð á góðar hjóla- og göngutengingar við miðborgina og gerir kröfu um að hjólastæði séu fyrri hverja íbúð og atvinnustarfssemi á svæðinu. Þannig verður húsnæðið á reitnum fjölbreytt en gert er ráð fyrir góðri blöndu atvinnu- og íbúðarhúsnæðis. Þetta býður upp á kjöraðstæður fyrir vistvæna ferðamáta.
Sett er skilyrði um að mismunandi arkitektastofur komi að hönnun og útliti húsanna til þess að tryggja fjölbreytileika.
Vistvænar lausnir
Gerð verður krafa um græn þök á byggingum sem þýðir að gras eða annar gróður verður á þökum en hann einangrar hús, bindur kolefni og minnkar þörf á upphitun auk þess sem gróður bindur vatn sem gufar í kjölfarið upp. Regnvatn af þökum sem vanalega er leitt í ræsi verður leitt í gegnum náttúrulega ferla. Slík lausn mun fegra almenningsrýmin og gera þau einstök í borginni.
Nýstárlegar lausnir í sorpmálum á svæðinu ýta undir flokkun sorps og auðvelt verður að bæta flokkunarmöguleikum við. Hæðarlega svæðisins tekur mið af nýjustu spám um hækkun sjávarstöðu auk þess sem allt affallsvatn verður nýtt til þess að hita upp almenningsrýmin á svæðinu.
Hús lækkuð og stíg bætt við
Samráð við hagsmunaaðila var eitt af markmiðum deiliskipulagsvinnunar, haldinn var fjölmennur fundur í Sjóminjasafninu Vík þar sem tillagan var kynnt auk þess sem farnar voru tvær fjölmennar göngur um skipulagssvæðið til þess að kynna rammaskipulagið sem tillagan byggir á. Komið var til móts við athugasemdir sem bárust á auglýsingartíma deiliskipulagsins með því að lækka hús næst hafnarbakkanum úr fimm hæðum í fjórar. Þá voru hús við Hlésgötu lækkuð til að gera húsahæðir á reitnum fjölbreyttari. Þá hefur verið bætt við stíg á norðausturhluta reits 03A en fyrri deiliskipulagstillaga var gagnrýnd fyrir að húsin sem standa næst hafnarbakka mynduðu nánast einn samfelldan vegg. Stígurinn dregur úr þessum áhrifum en rík áhersla er lögð á sjónása frá Mýrargötu niður að höfninni sem eykur tengsl gömlu byggðarinnar við hafnarsvæðið og sjóinn.
Nýlendureitur smækkaður
Helsta breyting deiliskipulags Nýlendureits felst í smækkun reitsins, vegna þess að ákveðið hefur verið að falla frá því að færa Mýrargötu norður fyrir Slippfélagshúsið, Mýrargötu 2 – 4. Mýrargata í núverandi legu afmarkar reitinn til norðurs.
Hætt er við að lengja Bræðraborgarstíg niður að Mýrargötu, en þess í stað gert ráð fyrir göngustíg sem liggur í beinu framhaldi af Bræðraborgarstíg frá Vesturgötu yfir Nýlendugötu og niður að Mýrargötu. Leiksvæði milli Vesturgötu og Nýlendugötu verður látið halda sér, í stað þess skipta því niður í lóðir, eins og deiliskipulagið sem samþykkt var 2007 gerði ráð fyrir.
Þar sem núverandi legu Mýrargötu verður ekki breytt og vegna breytinga deiliskipulags norðan Mýrargötu, sem áður var Slippa- Ellingsenreitur, en nefnist nú Vesturbugt, er gert ráð fyrir að Seljavegur haldi núverandi stefnu sinni. Þá myndast meira rými fyrir byggingar. Lagt er til að byggja megi raðhús á horni Seljavegs og Mýrargötu, en ein lóð á reitnum verður ætluð flutningshúsi. Þar sem skortur er á lóðum fyrir lítil flutningshús er gert ráð fyrir að önnur flutningshúsalóð fyrir lítið hús verði á horni Nýlendugötu og Seljavegs.
Nú liggur fyrir tillaga með nánari útfærslu rússneskrar rétttrúnaðarkirkju og hefur byggingarreitur kirkjunnar verið sniðinn að þeirri tillögu. Ekki er lengur gert ráð fyrir bílageymslu undir kirkjunni og lóð kirkjunnar verður opin og aðgengileg almenningi. Til að koma til móts við athugasemdir varðandi stærð rússnesku rétttrúnaðarkirkjunnar var byggingarreitur hennar þrengdur enn frekar, þannig að bygging á 75% grunnflatar megi ekki fara yfir 12 m (var áður 17 m), tveir litlir turnar megi fara upp í 17 m og einn stór turn í allt að 22 m.
Fallið frá stokkalausn á Mýrargötu
Hér er um að ræða breytingu á aðalskipulagi Reykjavíkur 2001-2024 sem gerði ráð fyrir að Mýrargata yrði lögð í stokk.
Breytingin er tvíþætt. Annarsvegar er fallið frá fyrri hugmyndum um stokk og færslu Mýrargötu við Slippasvæði. Hinsvegar er gert ráð fyrir breytingum á gatnamótum Geirsgötu og Kalkofnsvegar, þannig að þau verði hornrétt. Tilgangur breytinga er að aðalskipulag Reykjavíkur endurspegli framtíðarsýn þá sem birtist í rammaskipulagi fyrir svæði Gömlu hafnarinnar, varðandi útfærslu Mýrargötu-Geirsgötu og skapa forsendur fyrir deiliskipulagsgerð á svæðinu. Helstu ástæður þess að að falla frá stokkalausn fyrir Mýrargötu eru eftirfarandi:
- Breyttar forsendur um aukningu byggðar vestan Mýrargötu; áform um að fella út 700 íbúða landfyllingu við Ánanaust og falla frá hugmyndum um þróun blandaðrar byggðar á landfyllingu við Örfirisey, sbr. stefnumörkun í tillögu að nýju aðalskipulagi 2010-2030
- Taka tillit til verndargildis gömlu verbúðanna í Suðurbugt og endurspegla þannig stefnu um borgarvernd sem kemur fram í tillögu að nýju aðalskipulagi fyrir Reykjavík.
- Taka tillit til þeirrar gróskumiklu starfsemi sem hefur þróast á undanförnum árum við Slippinn og Suðurbugt.
- Breytt viðhorf til hönnunar gatna á miðborgarsvæðinu, sbr. stefnumörkun í tillögu að nýju aðalskipulagi.
Breytingartillagan, sem tekur eingöngu til þessara þátta, er í fullu samræmi við þá grundvallarstefnu sem mörkuð er í tillögu að nýju aðalskipulagi, en þar sem líklegt er að endanleg staðfesting nýs aðalskipulags verði tafsamt ferli var lagt til að gera þessa stöku breytingu nú. Tillaga að nýju aðalskipulagi 2010-2030 gerir ráð fyrir samhljóða breytingum á gatnaskipulaginu.
Tillögunum verður nú vísað til borgarráðs og borgarstjórnar til samþykktar.