Útikennsluapp fyrir leikskóla- og grunnskólabörn var kynnt í dag

Náttúruskólinn gaf á degi íslenskrar náttúru út nýtt forrrit til útikennslu og vettvangsnáms. Leikskólabörn úr Hofi fóru í fyrsta leiðangurinn með útikennsluappið og skemmtu sér konunglega í haustrokinu. 

Útikennsluappið er forrit fyrir spjaldtölvur og snjallsíma sem birtir námsefni fyrir leik- og grunnskólabörn á tilteknum gönguleiðum í öllum hverfum borgarinnar. Notendur fá GPS púnkta með áhugaverðum stöðum og námsefni í formi texta og hljóða sem miðar að því að efla útikennslu og umhverfismennt. Verkefnið var styrkt af þróunarsjóði skóla- og frístundasviðs Reykjavíkurborgar.

Við líflega athöfn í Hljómskálanum var útikennsluappið opnað á netinu af Oddnýju Sturludóttur, formanni skóla- og frístundaráðs, en því næst lagði fríð fylking leikskólabarna upp í vettvangsferð í Hljómskálagarðinum þar sem þau kynntust m.a. þjóðskáldinu Jónasi Hallgrímssyni og hlustuðu á þröstinn góða sem hann orti um.

Leiðbeiningar um hvernig hlaða megi útikennsluappinu í snjallsíma og spjaldtölur eru á vefslóðinni www.utikennsluapp.is,