Í dag kl. 16:00 rennur út frestur til að skila inn tilboðum í byggingarétt á lóðum í Úlfarsárdal og Reynisvatnsási, en borgarráð samþykkti í síðasta mánuði nýja skilmála. Horfið er frá sölu lóða á föstu verði með viðbótargjaldi en þær þess í stað boðnar út. Kaupendum byggingaréttar er boðið upp á staðgreiðsluafslátt eða afborgunarlaus lán fyrstu þrjú árin sem bera enga vexti fyrsta hálfa árið. Með opnu tilboðsferli er jafnræðis gætt meðal þeirra sem áhuga hafa á lóðum í Úlfarsárdal og Reynisvatnsási.
Í morgun höfðu borist um fjörtíu tilboð, en ekki liggur fyrir í hvað margar íbúðir. Allar slíkar upplýsingar verða teknar saman eftir að tilboðsfrestur rennur út í dag. „Reynslan sýnir okkur að flestir skila inn tilboðum síðasta daginn,“ segir Hrólfur Jónsson á skrifstofu eigna og atvinnuþróunar hjá Reykjavíkurborg.
Uppbygging í Úlfarsárdal
Í boði eru 127 lóðir með byggingarétti fyrir 271 íbúð í þessum tveimur hverfum við Úlfarsá.
Í Úlfarsárdal eru 86 lóðir með byggingarétti fyrir 218 íbúðir:
• 3 lóðir fyrir fjölbýlishús með samtals 72 íbúðir,
• 10 lóðir fyrir raðhús með samtals 56 íbúðum,
• 17 lóðir fyrir parhús með 34 íbúðum,
• 56 lóðir fyrir einbýlishús.
Í Reynisvatnsási býðst 41 lóð með byggingarétti fyrir 53 íbúðir:
• 2 lóðir fyrir raðhús með samtals 13 íbúðum,
• 1 lóð fyrir parhús með 2 íbúðum,
• 38 lóðir fyrir einbýlishús.
Með byggingu á þeim lóðum sem nú eru boðnar út verða hverfin fullbyggð miðaða við núverandi áform. Hjá Reykjavíkurborg ríkir bjartsýni um gott gengi þess útboðs. Það hefur nú þegar færst aukinn kraftur í uppbyggingu í Úlfarsárdal því fyrr í sumar var gengið frá sölu tveggja fjölbýlishúsalóða með byggingarrétti fyrir 96 íbúðir.
Nánari upplýsingar:
Lóðir í Reykjavik www.reykjavik.is/lodir.
Frétt um uppbyggingu: Sundlaug, íþróttahús og skóli í Úlfarsárdal.