Sjóða skal frosin ber vegna smithættu

Fréttatilkynning frá matvælaeftirliti Heilbrigðiseftirlits Reykjavíkur

Efni:  Heilbrigðiseftirlit Reykjavíkur, Matvælastofnun og sóttvarnalæknir hvetja almenning til að sjóða öll frosin ber.

Á undanförnum mánuðum hafa 30 einstaklingar í Danmörku greinst með lifrarbólgu A (Hepatitis A).  Grunur leikur á að einstaklingarnir hafi smitast vegna neyslu á frosnum berjum sem hafa verið notuð ósoðin í drykki (smoothies), eftirrétti og kökur.  Ekki hefur enn verið hægt að benda á ákveðna tegund berja en rannsókn er í gangi.

 

Í ljósi þessa faraldurs sem nú er í gangi í Danmörku og með hliðsjón af neytendavernd ráðleggur danska matvælastofnunin almenningi nú að sjóða öll frosin ber sem nota á í drykki, eftirrétti og kökur.  Neytendum hefur lengi verið ráðlagt að sjóða frosin hindber fyrir notkun vegna hættu á nóróveirusýkingum en nú er svo komið að ráðleggingarnar ná yfir öll frosin ber.  Á umbúðum hindberja sem eru á markaði hér á landi eru ráðleggingar þar að lútandi. 

 

Í ljósi þess að hérlendis eru sambærilegar vörur á markaði og í Danmörku og vinsælt er að nota frosin ber í drykki ráðleggur Heilbrigðiseftirlit Reykjavíkur, Matvælastofnun og sóttvarnalæknir neytendum að sjóða öll frosin ber í minnst eina mínútu áður en þau eru notuð í drykki og aðra rétti sem ekki eru hitaðir.  Heilbrigðiseftirlit Reykjavíkur, Matvælastofnun og sóttvarnalæknir munu fylgjast með málinu og birta frekari fréttir af rannsókn á uppruna smitsins þegar og ef  þær berast.

Ítarefni:

Tengill á vefsíðu Matvælastofnunar:  www.mast.is.

Tengill á vefsíðu sóttvarnalæknis varðandi lifrarbólgu A:  http://www.landlaeknir.is/smit-og-sottvarnir/smitsjukdomar/sjukdomur/item13077/Lifrarbolga-A.