Áningarstaðir, bætt aðstaða fyrir gangandi, fleiri bekkir og bætt lýsing á göngustíg eru meðal þeirra verkefna sem íbúar í Árbæ völdu og komust til framkvæmda í tengslum við verkefnaval Betra hverfi í fyrra. Íbúar sendu fyrst inn hugmyndir sem síðan var kosið um í opinni rafrænni kosningu.
Óskir íbúa í Árbænum beinast einkum að bættu umhverfi og útivistarmöguleikum. Óskaverkefnin sem unnin voru í Árbænum eru þessi:
- Bekkir og borð voru settir upp í Björnslundi og einnig var lagður þar stígur.
- Ruslastömpum var fjölgað í Norðlingaholti.
- Aðstaða til útivistar í Elliðaárdal var bætt með áningastöðum.
- Sparkvellir í hverfinu voru lagfærðir, mörk voru endurbætt og tyrft þar sem þörf var á.
- Ruslastömpum var fjölgað í Árbæ.
- Mannlíf á Árbæjartorgi var bætt með tímabundnu verkefni.
- Lýsing á göngustíg við Elliðaárvog meðfram Sævarhöfða var bætt með 6 ljósastaurum.
- Aðbúnaður fyrir gangandi var bættur með uppsetningu á 6 bekkjum á völdum stöðum í hverfinu. Einnig var komið fyrir ruslastampi og hellulagt undir bekkina.
- Útivistaraðstaða var sett upp í grenndarskógi við Ártúnsskóla.
- Tré voru gróðursett milli Höfðabakka og Hraunbæjar
- Leikskólarnir í hverfinu voru merktir betur.
- Gróðursett var í hljóðmanir við umferðaræðar í Norðlingaholti
- Áningarstaður var gerður við Árbæjarlaug.
- Settar voru upp merkingar í Elliðaárdal
- Áningarstaður í Elliðaárdal sunnan við Árbæjarskóla var útbúinn.
- Settur var upp vatnsbrunnur í Elliðaárdalnum við Árbæjarstífluna.
Verkefnum í fyrra var skipt í nýframkvæmdir annars vegar og viðhaldsverkefni hins vegar og þannig var haldið utan um þau í framkvæmdasjá. Sjá nánar um viðhaldsverkefni og nýframkvæmdir.
Heildarkostnaður framkvæmda við verkefni Betri hverfa í Árbæ er um 27 milljónir króna. Í ár verður einnig kallað eftir hugmyndum íbúa vegna verkefna og kosið milli þeirra ef þarf. Framkvæmdafé er óbreytt frá fyrra ári.