Íbúafundur með borgarstjóra í Grafarvogi

Jón Gnarr borgarstjóri mun funda með íbúum Grafarvogs í dag klukkan 17. Fundurinn er haldinn í Gufunesbæ. Þetta er tíundi og síðasti hverfisfundur borgarstjóra en fundirnir eru hluti af verkefninu Betra hverfi. 

Íbúar Grafarvogs eru hvattir til að mæta á fundinn og leggja fram hugmyndir að smærri verkefnum og viðhaldsframkvæmdum í Grafarvogi. Þá verður kosið í íbúanefnd sem á að fylgja eftir þeim verkefnum í hverfinu sem stillt verður upp til rafrænna íbúakosninga í mars. 

Íbúafundir borgarstjóra eru hluti af verkefninu Betri Hverfi en frá og með mánudeginum 14. janúar hafa Reykvíkingar getað sett inn hugmyndir að alls kyns smærri verkefnum, nýframkvæmdum og viðhaldsverkefnum, sem ætlað er að bæta hverfi borgarinnar. Tekið er á móti hugmyndum á samráðsvefnum Betri Reykjavík á undirvefnum Betri Hverfi. 

Í fyrra bárust hátt í 400 hugmyndir frá borgarbúum um verkefni í hverfunum. Þar af kusu Reykvíkingar 124 verkefni sem hafa nú verið framkvæmd að mestu.

 Reykjavíkurborg hyggst enn á ný verja 300 milljónum til svokallaðra hverfapotta og geta íbúar hverfanna komið með hugmyndir að verkefnum og síðan kosið um þær í rafrænum íbúakosningum sem haldnar verða dagana 14. - 19. mars nk. með sama hætti og í fyrra.