Heiti potturinn er nýtt verkefni á vegum Hins Hússins. Í pottinum gefst frábært tækifæri fyrir ungt fólk í Breiðholti til að fá fjármagn til að vinna að verkefnum í hverfinu sínu. Sótt er um á heimasíðu Hins Hússins og er umsóknarfrestur til 1. ágúst.
Verkefninu er ætlað að efla hverfisvitund, stuðla að jákvæðri ímynd hverfisins og styðja við fjölbreytt og skemmtilegt samfélag í Breiðholti. Kallað er eftir hugmyndum að fjölbreyttum, skemmtilegum og uppbyggilegum verkefnum til framkvæmdar í Breiðholti á árinu 2013. Veittir verða styrkir að hámarki 200.000 kr. fyrir hvert verkefni. Sjóðurinn er opinn öllu ungu fólki á aldrinum 16 - 25 ára og þurfa umsækjendur að hafa lögheimili í hverfinu. Bæði einstaklingar og hópar geta sótt um styrkinn.
Allar frekari upplýsingar má nálgast hjá Upplýsingamiðstöð Hins hússins í síma 411 5500 eða í Pósthússtræti 3 - 5 þar sem einnig er veitt aðstoð við gerð umsókna.