Heilbrigðiseftirlitið mælir með vistvænum samgöngum í Heiðmörk
Umhverfi Heilbrigðiseftirlit
Heilbrigðiseftirlit Reykjavíkur vill í tilefni af tveimur aðsendum greinum í Morgunblaðið þann 21. og 22. febrúar leiðrétta misskilning sem þar kemur fram. Staðhæft er í báðum greinunum að Heilbrigðiseftirlit Reykjavíkur hafi afturkallað deiliskipulag Heiðmerkur. Heilbrigðiseftirlitið hefur engin völd til að afturkalla deiliskipulag en er umsagnaraðili eins og almenningur og aðrir hagsmunaaðilar.
Heilbrigðiseftirlitið hefur í umsögnum sínum ekki einbeitt sér að umferð hesta um Heiðmörk eins og greinarhöfundar virðast telja. Umsagnir eftirlitisins snúast að mestu leyti um áhyggjur af aukinni bílaumferð á svæðinu. Heilbrigðiseftirlitið hefur af þeim sökum mælt með vistvænum samgöngum, takmörkunum á bílaumferð og mengunarvörnum með framtíðina að leiðarljósi.
Í ljósi þess að hestamenn hafa tjáð sig um málefni Heiðmerkur vill Heilbrigðiseftirlitið taka fram að bannað er flytja úrgang inn á svæðið og skilja eftir þ.á.m. hrossatað, en talsverð hesthúsabyggð er í nágrenni svæðisins.
Skógrækt í Heiðmörk er samkvæmt samningi við Reykjavíkurborg og háð þeim takmörkunum t.d. á áburðarnotkun sem samþykkt um vatnsvernd á höfuðborgarsvæðinu nr. 636/1997 kveður á um.
Gæði sem falin er í ástandi grunnvatns og neysluvatns frá Heiðmerkusvæðinu er óumdeild auðlind sem á að verja til allrar framtíðar. Heilbrigðiseftirlit Reykjavíkur stendur vörð um þessi gæði og framfylgir lögum og reglum þar og notendur svæðisins eiga að fara eftir.
Tengill:
Vatnsverndarsvæðið.