Betri róluvellir, aðgengi að fjörum og aðgengi gangandi og hjólandi eru meðal þeirra verkefna sem íbúar í Vesturbæ völdu og komust til framkvæmda í tengslum við verkefnaval Betri hverfa í fyrra. Íbúar sendu fyrst inn hugmyndir sem síðan var kosið um í opinni rafrænni kosningu.
Óskir íbúa í Vesturbænum beinast þannig einkum að bættu umhverfi og útivistarmöguleikum, en einnig völdu þeir betri jólaskreytingar.
Óskaverkefnin sem unnin voru í Vesturbænum eru þessi:
-
Róluvöllur við Nýlendu- og Vesturgötu var endurbættur en skipulag gerir ráð fyrir götu á þessum stað.
-
Hönnun að endurbættu dvalarsvæði við Aflagranda 40 liggur fyrir og búið er að kaupa ný leiktæki sem sett verða upp þegar aðstæður leyfa.
-
Stærri ruslastampur var settur við strætóskýlið hjá Háskóla Íslands.
-
Búið er að hanna lagfæringar á fótboltavelli og leiksvæði við Reynimel 68 – 74, kaupa ný leiktæki og girðingarefni og verður haldið áfram með framkvæmdir þegar aðstæður leyfa.
-
Umferðaröryggi við Melaskóla var bætt með uppsetningu stöpla eða staura til að hindra að lagt sé upp á stéttum. Aðgerðin er til bráðabirgða en sett hefur verið fram til skoðunar hugmynd um girðingu á skólalóðina á þessum stað.
-
Lynghagaróló var endurbættur. Sandur var settur í kassann, sem og nýtt malarlag á fótboltavöllinn og tyrft í kring.
-
Hjólabraut á Öldukotsróló var hellulögð.
-
Hönnun á leikaðstöðu á Landakotstúni liggur fyrir. Leiktæki hafa verið keypt og haldið verður áfram með framkvæmdir þegar aðstæður leyfa.
-
Jólaskreytingar voru settar upp í Vesturbænum fyrir jólin.
-
Aðstaða fyrir börn í garðinum við Vesturbæjarsundlaug var bætt. Sett voru upp leiktæki og umhverfið fegrað með gróðursetningu trjáplantna.
-
Aðgengi að fjöru við Eiðsgranda var bætt með stiga niður í fjöru.
-
Aðgengi að í fjöru í Skerjafirði var bætt með gerð stiga.
-
Aðgengi gangandi og hjólandi við Mýrargötu og Fiskislóð var bætt. Gerð var gönguleið yfir Mýrargötu við hringtorgið og önnur akbraut Mýrargötu þrengd til að auka umferðaröryggi.
-
Settar voru upp körfuboltakörfur á svæði KR
-
Umhverfi við Hofsvallagötu sunnan við Einimel var fegrað með gróðursetningu trjáplantna.
-
Útivistaraðstaða á grænu svæði við Brekkustíg 14b var bætt í samráði við íbúa nærliggjandi húsa.
- Nestisbekkir voru settir á tvo áningarstaði við Ægisíðu.
Heildarkostnaður framkvæmda við verkefni Betri hverfa í Vesturbæ árið 2012 var um 37 milljónir króna og verður framkvæmdfé óbreytt í ár. Vefurinn Betri Reykjavík – Betri hverfi er nú opinn fyrir móttöku hugmynda og rökræðum íbúa vegna smærri hverfaverkefna. Í mars verður kosið um verkefni til framkvæmda.
Borgarstjóri stendur fyrir íbúafundum nú í janúar í öllum hverfum um verkefnið Betri hverfi. Fundað verður um málefni Vesturbæjar í Hagaskóla fimmtudaginn 17. janúar kl. 17.